خیبر پختونخوا میں اعضا کی پیوندکاری کے نظام میں انقلابی پیش رفت

مشیر صحت اور ایڈمنسٹریٹر ٹرانسپلانٹ اتھارٹی کی اہم ملاقات

جمعہ 13 جون 2025 02:50

پشاور(اُردو پوائنٹ اخبارتازہ ترین - این این آئی۔ 13 جون2025ء)وزیر اعلیٰ خیبر پختونخوا کے مشیر صحت احتشام علی نے ٹرانسپلانٹ اتھارٹی کے دفتر کا دورہ کرتے ہوئے ایڈمنسٹریٹر پروفیسر آصف ملک سے ملاقات کی ہے۔ ملاقات میں صوبے میں اعضا کی پیوندکاری کے نظام کو مزید مؤثر، منظم اور شفاف بنانے کے لیے اہم فیصلے کیے گئے۔ملاقات میں اس امر پر اتفاق کیا گیا کہ پیوندکاری سے متعلق تمام سہولیات کو ایک چھت تلے فراہم کیا جائے گا، جبکہ اس نظام کو ایک خودمختار بورڈ آف گورنرز (BoG) کے تحت چلایا جائے گا تاکہ اس میں شفافیت، جوابدہی اور کارکردگی کو یقینی بنایا جا سکے۔

مزید برآں، کیڈاورک ڈونیشن (مرنے کے بعد اعضا عطیہ کرنے کا نظام) کو صوبے میں فروغ دینے کے لیے مؤثر اقدامات اٹھانے کا فیصلہ بھی کیا گیا۔

(جاری ہے)

وزیر صحت نے اس موقع پر خیبر پختونخوا میں پہلی بار کیڈاورک ڈونیشن اور اعضا کی کامیاب پیوندکاری پر ٹرانسپلانٹ اتھارٹی کو مبارکباد دی۔انہوں نے 14 سالہ بچے کے اعضا عطیہ کرنے کے واقعے کو صوبے کی تاریخ میں ایک تاریخی لمحہ قرار دیا، جس کی بدولت کئی مریضوں کو نئی زندگی ملی۔

وزیر صحت نے اعلان کیا کہ اس عظیم انسان دوستی پر بچے کے خاندان کو حکومت کی جانب سے باقاعدہ اعزاز سے نوازا جائے گا، اور وزیر اعلیٰ خیبر پختونخوا خود ان سے ملاقات کریں گے تاکہ ان کی قربانی کو خراجِ تحسین پیش کیا جا سکے۔وزیر صحت نے کہا کہ حکومت ٹرانسپلانٹ اتھارٹی کے ساتھ ہر ممکن تعاون جاری رکھے گی اور صوبے میں مرنے کے بعد اعضا عطیہ کرنے کے شعور کو عام کیا جائے گا تاکہ مزید زندگیاں بچائی جا سکیں۔