ہم سب نے مل کر جرائم پیشہ عناصر کیخلاف کارروائیاں تیز کرنی ہیں ،ایس ایس پی لسبیلہ ذ

جمعہ 13 جون 2025 18:31

کوئٹہ (اُردو پوائنٹ اخبارتازہ ترین - اے پی پی۔ 13 جون2025ء) ڈسٹرکٹ ہیڈکوارٹر لسبیلہ میں جرائم پیشہ عناصر کیخلاف کارروائیاں اور امن و امان کے حوالے سے پولیس دربار کا انعقادکیا گیا۔ڈی ایس پی سرکل اوتھل حاصل خان قمبرانی ، ڈسٹرکٹ لسبیلہ کے تمام تھانہ جات کے ایس ایچ اوز، اہم ڈیوٹیوں پر تعینات ملازمان پولیس اور دفتر اسٹاف نے شرکت کی۔ پولیس دربار سے ایس ایس پی لسبیلہ عاطف امیر نے خطاب کرتے ہوئے کہا کہ موجودہ صوبائی سکیورٹی صورتحال سے آپ تمام افسران و اہلکاران بخوبی واقف ہو۔

ہم سب نے ملکر جرائم پیشہ عناصر کیخلاف کارروائیاں تیز کرنی ہیں اور ضلع لسبیلہ کو جرائم سے پاک کرنا ہے اس کے علاوہ ملک دشمن عناصر کی نقل و حرکت پر کڑی نظر رکھنی ہے ۔ایس ایس پی لسبیلہ عاطف امیر نے مزید کہا کہ مجھے غیر حاضری سے سخت نفرت ہے اگر کسی کا کوئی جائز مسئلہ ہو تو وہ افسر و اہلکار چھٹی لے سکتا ہے۔

(جاری ہے)

ایس ایس پی لسبیلہ نے کہا کہ پولیس ایک ڈسپلن فورس ہے اس میں سزا و جزا کا توازن جب تک برقرار نہیں رکھا جائے گا تب تک انصاف قائم نہیں کیا جاسکتا ہے۔

انہوں نے مزید کہا کہ مجھے ڈسٹرکٹ لسبیلہ میں تعینات ہوئے دو ماہ ہوئے ہیں، میں نے اس مختصر عرصہ میں اگر 30 ملازمین پولیس کو سزا دی ہے تو 150 سے زائد پولیس افسران و اہلکاران کو اچھی کارکردگی پر نقد انعام اور تعریفی اسناد سے بھی نوازا ہے۔ اگر کوئی پولیس افسریا اہلکار اپنے فرائض منصبی میں غفلت برتے گا اور اپنی ڈیوٹی سے غیر حاضر پایا جائیگا تو ایسے ملازم پولیس کو سزا ہی دی جائے گی نہ کہ پھولوں کا ہار پہنایا جائیگا۔ آخر میں پولیس افسران و جوانوں نے اپنے مسئلے مسائل بیان کئے جن کو ایس ایس پی لسبیلہ نے فوری طور پر حل کرنے کے لئے موقع پر احکامات جاری کیے۔