ایران اسرائیل کشیدگی، صرف 2 دن میں دنیا بھر کی 6 ہزار پروازیں منسوخ

سب سے زیادہ تل ابیب، دمشق، بغداد، تہران، بیروت اور امان کوئین ائیرپورٹ متاثر ہورہے ہیں

اتوار 15 جون 2025 12:05

ایران اسرائیل کشیدگی، صرف 2 دن میں دنیا بھر کی 6 ہزار پروازیں منسوخ

کراچی (اُردو پوائنٹ اخبارتازہ ترین - این این آئی۔ 15 جون2025ء)اسرائیل اور ایران کے مابین جاری جنگ کے باعث دو دن میں دنیا بھر کی 6 ہزار پرواز منسوخ کر دی گئی ہیں۔ ایوی ایشن ذرائع کے مطابق ایران اسرائیل جنگ کے بعد سب سے زیادہ اسرائیل کا تل ابیب ائیر پورٹ متاثر ہوا ہے جبکہ دمشق، بغداد، تہران، بیروت اور امان کوئین ائیرپورٹ بھی مسلسل بند ہیں۔ذرائع کے مطابق ایران، شامل کے شہر بغداد اور اسرائیل کی فضائی حدود 2 روز سے مسلسل بند ہے جبکہ اردن لبنان شام کی فضائی حدود سے مخصوص پروازیں پیشگی اجازت سے جزوی طور پر گزر سکی ہیں۔

ذرائع کے مطابق اسرائیل کے تل ابیب ائیرپورٹ سے 44 ممالک کے لیے یومیہ 100 ائیرپورٹس کی پروازیں آپریٹ کی جاتی ہیں جبکہ اردن کے امان کوئین عالیہ ائیرپورٹ سے روزانہ 40 ملکوں کے 81 ائیرپورٹ کی پروازیں چلائی جاتی ہیں۔

(جاری ہے)

شام کے دمشق ائیرپورٹ سے 13 ملکوں کی ملکوں کے 20 ائیرپورٹس پر سروس فراہم کی جاتی ہے جبکہ عراق کے بغداد ایئرپورٹ سے 18 ممالک کے 32 ائیرپورٹس کی پروازیں آتی جاتی ہیں۔

ایران کے تہران ائیرپورٹ سے 23 ملکوں کے 51 ائیرپورٹس پر فضائی سروس فراہم کی جاتی ہے جبکہ لبنان کے بیروت ائیرپورٹ سے 26 ممالک کے 49 ائیرپورٹس کے لیے پروازیں چلائی جاتی ہیں۔ فلائٹ ریڈار کے ڈیٹا کے مطابق ان ائیرپورٹس کی ایک دن میں 3 ہزار پروازیں منسوخ ہورہی ہیں جبکہ بڑی تعداد میں پروازیں متاثر بھی ہوئیں۔