آئندہ چوبیس گھنٹوں کے دوران لاہور سمیت پنجاب کے بیشتر اضلاع میں موسم گرم مطلع جزوی طور پر ابر آلود رہے گا، محکمہ موسمیات

اتوار 15 جون 2025 17:10

لاہور (اُردو پوائنٹ اخبارتازہ ترین - اے پی پی۔ 15 جون2025ء) محکمہ موسمیات کی پیشگوئی کے مطابق آئندہ چوبیس گھنٹوں کے دوران صوبائی دارالحکومت لاہور سمیت صوبے کے بیشتر اضلاع میں موسم گرم جبکہ مطلع جزوی طور پر ابر آلود رہنے کا امکان ہے تاہم آندھی،جھکڑ چلنے اور گرج چمک کے ساتھ چند مقامات پربارش کی توقع ہے۔

(جاری ہے)

ترجمان محکمہ موسمیات کے مطابق آئندہ چوبیس گھنٹوں کے دوران لاہور سمیت سیالکوٹ، نارووال، گجرات،گوجرانوالہ، سرگودھا، بھکر، حافظ آباد، منڈی بہائوالدین، شیخوپورہ، فیصل آباد، جھنگ، ساہیوال، بہاولنگر، رحیم یار خان، لیہ، ملتان، بہاولپور، ڈیرہ غازی خان اور گردونواح میں آندھی،جھکڑ چلنے اور گرج چمک کے ساتھ چند مقامات پربارش کی توقع ہے ،جبکہ گزشتہ چوبیس گھنٹوں کے دوران پنجاب کے شمال مشرقی و وسطی علاقوںکے چند مقامات پربارش ہوئی۔

لاہور میں کم سے کم درجہ حرارت31 اور زیادہ سے زیادہ41سینٹی گریڈ ریکارڈ کیا گیا جبکہ ہوا میں نمی کا تناسب25فیصدرہا۔لاہور میں آلودگی کی مجموعی شرح 117فیصد رہی جبکہ شہر کے مختلف علاقوں شاہراہ قائد اعظم 61،لا ہور امر یکن سکول84، جوہر ٹائون 69،یو ایم ٹی82، پاور جنریشن پرائیویٹ لمیٹڈ 69اورعسکری ٹین میں 80ایئر کوالٹی انڈیکس ریکارڈ کیا گیا۔