حکومت نے بجلی کے بعد پیٹرولیم سیکٹر کے گردشی قرض سے چھٹکارے پر کام شروع کر دیا

پیٹرولیم سیکٹر کے گردشی قرض کی اصل رقم 2083 ارب روپے ہے، گیس ،پیٹرولیم کے قرض پر سود کی رقم 814 ارب ہے

اتوار 15 جون 2025 17:50

لاہور(اُردو پوائنٹ اخبارتازہ ترین - این این آئی۔ 15 جون2025ء)حکومت نے بجلی کے بعد پیٹرولیم سیکٹر کے گردشی قرض سے چھٹکارے پر کام شروع کر دیا۔دستاویزات کے مطابق اس وقت توانائی سیکٹر کا گردشی قرض 5 ہزار 200 ارب روپے سے زائد ہے۔ اس میں گیس سیکٹر کا گردشی قرض 2ہزار 897 ارب ، بجلی کا گردشی قرض 2 ہزار 400 ارب روپے ہے۔

(جاری ہے)

ذرائع کے مطابق حکومت نے گیس شعبے کے گردشی قرض کے آڈٹ کا فیصلہ کرلیا، آڈٹ کے لئے تھرڈ پارٹی فرم ہائر کی جائے گی۔

آڈٹ کے بعد حتمی رقم سامنے آنے کے بعد گیس شعبے کے گردشی قرض سے نمٹنے کے پلان پر عملدرآمد کا آغاز ہوگا۔وزارت پیٹرولیم کے مطابق گیس اور پیٹرولیم سیکٹر کے گردشی قرض کی اصل رقم 2083 ارب روپے ہے، گیس اور پیٹرولیم سیکٹر کے گردشی قرض پر سود کی رقم 814 ارب روپے ہے۔ او جی ڈی سی ایل کو گیس کمپنیوں نے 1183 اربے روپے دینے ہیں، پی ایس او کے 814 ارب روپے اور پی پی ایل کے 803 ارب روپے ہیں۔