کوئی جماعت موسم کو قابو یا تبدیل نہیں کر سکتی، شازیہ مری

کراچی / اسلام آباد(اُردو پوائنٹ اخبارتازہ ترین - این این آئی۔ 22 اگست2025ء) پاکستان پیپلز پارٹی پارلیمنٹرینز کی مرکزی اطلاعات سیکرٹری، شازیہ مری نے کہا ہے کہ کوئی سیاسی جماعت موسم کو قابو یا تبدیل نہیں کر سکتی لیکن موسمیاتی تبدیلی کے سنگین اثرات سے نمٹنے کے لیے اجتماعی کوششیں ناگزیر ہیں۔کراچی اور سندھ میں حالیہ شدید بارشوں پر تبصرہ کرتے ہوئے انہوں نے زور دیا کہ قدرتی آفات کو روکا نہیں جا سکتا لیکن بروقت تیاری اور درست منصوبہ بندی کے ذریعے انہیں سنبھالا جا سکتا ہے۔

انہوں نے کہاکہ عوام نے پاکستان پیپلز پارٹی کو کراچی سمیت پورے سندھ کی خدمت کے لیے منتخب کیا ہے،پیپلز پارٹی ہمیشہ عوام کے ساتھ مشکل وقت میں کھڑی رہی ہے اور ہمیشہ کھڑی رہے گی۔انہوں نے بتایا کہ صدر آصف علی زرداری اور پیپلز پارٹی کے چیئرمین بلاول بھٹو زرداری بارشوں کی ہنگامی صورتحال کے دوران مستقل طور پر انتظامیہ سے رابطے میں رہے، جبکہ وزیر اعلیٰ سندھ نے خود کراچی میں نکاسی آب کے انتظامات کی نگرانی کی۔

(جاری ہے)

شازیہ مری نے کہا کہ سیوریج کی صفائی اور مرمتی کام مون سون سے کئی ماہ قبل شروع کر دیے گئے تھے جس سے بڑے بحران سے بچنے میں مدد ملی۔ انہوں نے کہاکہ کراچی کے میئر مرتضیٰ وہاب بارشوں کے دوران دن رات عوام کے ساتھ کام کرتے نظر آئے، اگر یہ تیاریاں نہ ہوتیں تو صورتحال کہیں زیادہ تباہ کن ہو سکتی تھی۔نہوں نے شہریوں کو درپیش مشکلات کا اعتراف کرتے ہوئے یقین دلایا کہ صوبائی حکومت ہر ممکن امداد فراہم کر رہی ہے۔

انہوں نے کہاکہ چند سیاسی جماعتیں صرف تنقید میں مصروف ہیں، حالانکہ عوام نے انہیں مسترد کردیا۔ بدقسمتی سے اس مشکل وقت میں بھی مخالفین محض بیانات تک محدود رہے۔انہوں نے کہا کہ عوام کی سلامتی اور امدادی سرگرمیوں کے لیے تمام دستیاب وسائل اور افرادی قوت بروئے کار لائی گئی ہے،دنیا کے ترقی یافتہ شہر بھی ایسی شدید بارش میں زیر آب آ جاتے ہیں، لیکن کراچی میں بارش رکنے کے فوراً بعد پانی تقریباً مکمل طور پر نکال دیا گیا۔

شازیہ مری نے میڈیا پر زور دیا کہ وہ صرف مشکلات ہی نہیں بلکہ ان علاقوں کی بھی کوریج کرے جہاں پانی کی نکاسی ہو چکی ہے اور حالات بہتر ہو رہے ہیں تاکہ عوام کو زمینی سطح پر ہونے والی پیش رفت دکھائی جا سکے۔اپنے عزم کا اعادہ کرتے ہوئے انہوں نے کہاکہ پاکستان پیپلز پارٹی سندھ اور کراچی کے عوام کی خدمت ہمیشہ پوری لگن کے ساتھ جاری رکھے گی۔