وزیر اعلیٰ کے معاون خصوصی برائے محکمہ بہبود آبادی ملک لیاقت علی خان سے نیسپاک حکام کی ملاقات

میدان ٹو براول ٹنل منصوبے کی تکنیکی رپورٹ، فزیبلٹی سٹڈی، ابتدائی ڈیزائن اور مجوزہ لاگت پر بریفنگ دی

منگل 17 جون 2025 19:35

پشاور(اُردو پوائنٹ اخبارتازہ ترین - این این آئی۔ 17 جون2025ء)وزیر اعلیٰ کے معاون خصوصی برائے محکمہ بہبود آبادی خیبرپختونخوا، ملک لیاقت علی خان نے نیسپاک حکام سے ایک اہم اور تفصیلی ملاقات کی، جس کا مقصد دیر لوئر کو دیر بالا سے جوڑنے والے میدان ٹو براول ٹنل کے منصوبے پر بریفنگ لینا اور آئندہ کے لائحہ عمل پر مشاورت کرنا تھا۔اس موقع پر نیسپاک کی اعلیٰ سطحی انجینئرنگ ٹیم نے ملک لیاقت علی خان کو منصوبے کی تکنیکی رپورٹ، فزیبلٹی اسٹڈی، ابتدائی ڈیزائن اور مجوزہ لاگت پر باضابطہ بریفنگ دی۔

حکام نے بتایا کہ ٹنل کی تعمیر نہ صرف سفری وقت میں نمایاں کمی لائے گی بلکہ دونوں اضلاع کے درمیان معاشی، تجارتی اور سماجی روابط کو بھی فروغ دے گی۔وزیر اعلیٰ کے معاون خصوصی برائے محکمہ بہبود آبادی ملک لیاقت علی خان نے نیسپاک ٹیم کو بتایا کہ میدان ٹو براول ٹنل کا منصوبہ عوام کی دہائیوں پر محیط خواہش ہے۔

(جاری ہے)

یہ صرف ایک سڑک یا ٹنل نہیں بلکہ ایک نئے ترقیاتی دور کا آغاز ہوگا، جو اپر اور لوئر دیر کے درمیان فاصلے کو کم کرے گا اور لوگوں کی زندگیوں میں آسانی لائے گا۔

انہوں نے مزید کہا کہ یہ منصوبہ ان کی خصوصی توجہ اور نگرانی میں آگے بڑھایا جائے گا تاکہ کوئی رکاوٹ یا تاخیر نہ ہو۔ انہوں نے متعلقہ اداروں کو ہدایت دی کہ وہ تمام تخمینہ جاتی، ماحولیاتی، اور سوشل امپیکٹ رپورٹس کو بروقت مکمل کریں تاکہ منصوبے پر عملی کام جلد از جلد شروع کیا جا سکے۔نیسپاک حکام نے بھی یقین دہانی کرائی کہ منصوبے کو قومی اہمیت کے تحت فوری ترجیح دی جا رہی ہے، اور تمام ابتدائی مراحل جلد مکمل کر لیے جائیں گے۔ملک لیاقت خان نے کہا ہے کہ یہ منصوبہ نہ صرف دیر لوئر و دیر بالا بلکہ پورے ملاکنڈ ڈویژن کے لیے ایک گیم چینجر ثابت ہوگا۔