چٹ پٹے مزیدارتکے،کباب، کوفتے،ریڈی ٹو کک فروزن میٹ کھانے والے ہوشیار!

ڈی جی فوڈ اتھارٹی کے حکم پر ہربنس پورہ میں واقع فروزن میٹ اینڈ ریڈی ٹو کوک میٹ پروڈکشن یونٹ کی چیکنگ

بدھ 18 جون 2025 21:56

لاہور (اُردو پوائنٹ اخبارتازہ ترین - آن لائن۔ 18 جون2025ء) چٹ پٹے مزیدار تکے،کباب، کوفتے،ریڈی ٹو کک فروزن میٹ کھانے والے ہوشیار ہوجائیں، ڈی جی فوڈ اتھارٹی کے حکم پر ہربنس پورہ میں واقع فروزن میٹ اینڈ ریڈی ٹو کوک میٹ پروڈکشن یونٹ کی چیکنگ کی گئی، تفصیلات کے مطابق 1 ہزار 565 کلو ایکسپائر میٹ پروڈکٹس تلف کر کے یونٹ بند کر دیا گیا، صفائی کے انتہائی ناقص انتظامات، گندے فریزر میں بدبودار ایکسپائر گوشت رکھا پایا گیا۔

ڈی جی فوڈ اتھارٹی کے مطابق ناقص زائدالمیعاد کباب، کوفتے تکے زمین پر رکھے پائے گئے۔

(جاری ہے)

بدبودار ناقص تیار کباب،تکے، کوفتے دلکش پیکنگ میں مختلف مارٹس اور بڑے سٹورز پر سپلائی کیے جانے تھے۔ برآمد شدہ لاکھوں مالیت کا غیر معیاری گوشت،تیار کوفتے،کباب تلف کر کے یونٹ بند کر دیا گیا۔ ڈی جی فوڈ اتھارٹی نے کہا ناقص غیر معیاری گوشت کا استعمال معدہ اور آنتوں کی مختلف امراض کا سبب بن سکتا ہے۔ پنجاب بھر میں خوراک کا کاروبار کرنے کے لیے پنجاب فوڈ اتھارٹی قوانین پر عمل درآمد انتہائی لازم ہے۔قوانین کی خلاف ورزی کرنے والوں کو کسی صورت رعایت نہیں دی جائے گی۔ جعلسازی کرنے والوں کی پنجاب میں کوئی جگہ نہیں، خاتمے کے لیے مسلسل کارروائیاں جاری ہیں۔