لاہور کی 40 سے زائد اہم شاہراوں پر ایل ڈبلیو ایم سی آپریشن ٹیموں کی سکریپنگ اور واشنگ ایکٹیویٹیز

جمعرات 19 جون 2025 18:15

لاہور (اُردو پوائنٹ اخبارتازہ ترین - اے پی پی۔ 19 جون2025ء) ایل ڈبلیو ایم سی شہرِ کے ہر گھر،گلی محلے کو ویسٹ فری کرنے کے ساتھ ساتھ صاف ماحول کی فراہمی ممکن بنانے کیلئے پرعزم ہے۔اس مقصد کی تکمیل کے لیے چیف ایگزیکٹو آفیسر لاہور ویسٹ مینجمنٹ کمپنی کی ہدایت پرایل ڈبلیو ایم سی کی آپریشن ٹیمیں شہر بھر میں ویٹ سویپنگ اور پانی کا چھڑکائو یقینی بنا رہی ہیں جبکہ شہر کی 40سے زائد اہم شاہراہوں پر سکریپنگ اور واشنگ آپریشن کے ساتھ ساتھ خصوصی صفائی ایکٹیویٹیز جاری ہیں۔

اس سلسلے میں فیروز پور روڈ، حالی روڈ، مین بلیوارڈ گلبرگ، نور جہاں روڈ اور مال روڈ پر سکریپنگ اور واشنگ کا آغاز کر دیا گیا ہے۔ سگیاں روڈ، تاج کمپنی روڈ، شاہدرہ چوک، جی ٹی روڈ، ٹرک اڈا، لاری اڈا میں صفائی ٹیمیں تعینات ہیں۔

(جاری ہے)

سرکلر روڈ، ایک موری پل، ریلوے اسٹیشن، شالامار باغ، بھوگی وال روڈ، داروغہ والا، سلامت پورہ میں سکریپنگ اور سپرنکلنگ کی جا رہی ہے جبکہ مومن پورہ بھینی روڈ، دھرم پوری، ہربنس پورہ، رحمان پورہ میں بھی سکریپنگ ایکٹیویٹی کی جا رہی ہے۔

مولانا شوکت علی روڈ، پیکو روڈ، اللہ ہو چوک، کالج روڈ، باگڑیاں چوک، کچا جیل روڈ، مادر ملت روڈ، ملتان روڈ، ٹھوکر چوک، ایم اے او چوک، چوبرجی، آزادی چوک پرایل ڈبلیو ایم سی کے صفائی ورکرز تعینات کر دیئے گئے ہیں۔ سی ای او ایل ڈبلیو ایم سی بابر صاحب دین کاکہنا ہے کہ شہریوں کو صاف ستھرا ماحول فراہم کرنا ہی اولین ترجیح ہے۔انہوں نے کہا کہ شہریوں سے بھی گزارش ہے کہ ماحولیاتی آلودگی سے بچائو کے لیے احتیاطی تدابیر اختیار کریں،کوڑا ہمیشہ کوڑے دان میں ڈالیں یا صفائی عملے کے حوالے کریں۔صفائی سے متعلق شکایات کے ازالے کے لیے ایل ڈبلیو ایم سی کی ہیلپ لائن 1139پر رابطہ کریں یا سوشل میڈیا کا استعمال کریں۔