مشیر صحت احتشام علی نے پولیس اینڈ سروسز ہسپتال میں جدید تشخیصی سہولیات کا افتتاح کردیا

جمعرات 19 جون 2025 20:35

پشاور(اُردو پوائنٹ اخبارتازہ ترین - این این آئی۔ 19 جون2025ء)مشیر صحت خیبر پختونخوا احتشام علی نے پولیس اینڈ سروسز ہسپتال میں سی ٹی سکین، اینڈوسکوپی اور ای ٹی ٹی سروسز کا باضابطہ افتتاح کر دیا۔جمعرات کے روز اپنے دورہ کے دوران مشیر صحت احتشام علی نے ریڈیالوجی ڈیپارٹمنٹ میں سی ٹی سکین، کارڈیالوجی شعبہ میں ای ٹی ٹی جبکہ گیسٹروانٹرولوجی ڈیپارٹمنٹ میں اینڈوسکوپی سروسز کا افتتاح کیا۔

اس موقع پر ایم ایس پولیس اینڈ سروسز ہسپتال ڈاکٹر مشتاق آفریدی، متعلقہ شعبہ جات کے سربراہان اور طبی عملہ بھی موجود تھا۔احتشام علی نے اس موقع پر کہا کہ ان سروسز کی فراہمی سے پولیس اینڈ سروسز ہسپتال کی تشخیصی صلاحیت میں نمایاں بہتری آئے گی اور سرکاری ملازمین کو بروقت علاج میسر ہوگا۔

(جاری ہے)

ماضی میں سرکاری ملازمین کو ان سروسز کے لیے دیگر ہسپتالوں کا رُخ کرنا پڑتا تھا، مگر اب یہ سہولیات انہی کے اپنے ہسپتال میں دستیاب ہیں۔

انہوں نے مزید کہا کہ پولیس اینڈ سروسز ہسپتال لاکھوں سرکاری ملازمین اور ان کے خاندانوں کے علاج و معالجے کے لیے ایک اہم ادارہ ہے، اور ایم ایس ڈاکٹر مشتاق اور ان کی ٹیم اس شاندار کاوش پر داد و تحسین کی مستحق ہے۔اس موقع پر ایم ایس ڈاکٹر مشتاق آفریدی نے بتایا کہ ان سروسز کے آغاز سے او پی ڈی میں تین گنا اضافہ متوقع ہے، کیونکہ یہ اہم تشخیصی مراحل پہلے دوسرے ہسپتالوں میں ریفر کیے جاتے تھے۔ اب پورے صوبے کے سرکاری ملازمین اور ان کے اہل خانہ ان سہولیات سے براہِ راست مستفید ہو سکیں گے۔