مویشیوں کی نقل و حرکت کے دوران ہر جانور پر اسپرے یقینی بنایا جائے ، ڈائریکٹر لائیو سٹاک کی متعلقہ عملے کو ہدایت

ہفتہ 21 جون 2025 21:00

راولپنڈی (اُردو پوائنٹ اخبارتازہ ترین - اے پی پی۔ 21 جون2025ء) ڈائریکٹر لائیوسٹاک راولپنڈی ڈویژن ڈاکٹر نوید سحر نے تحصیل کلر سیداں کا دورہ کیا ۔ انہوں نے ڈپٹی ڈائریکٹر کلر سیداں ڈاکٹر خرم ارشاد کے ہمراہ کانگو بخار سے بچاؤ کے لیے قائم چیک پوسٹوں کا معائنہ کیا۔ اس موقع پر چیک پوسٹوں پر عملے کی حاضری، دستیابی، کارکردگی اور حفاظتی اقدامات کا تفصیلی جائزہ لیا گیا۔

ڈائریکٹر لائیوسٹاک نے مویشیوں پر چیچڑ مار اسپرے، ریکارڈ کی جانچ پڑتال اور دیگر حفاظتی انتظامات کا بھی مشاہدہ کیا۔

(جاری ہے)

ڈاکٹر نوید سحر نے ہدایت کی کہ عملہ مکمل جذبے، مستعدی اور احتیاط کے ساتھ اپنی ڈیوٹی انجام دے تاکہ جانوروں سے پھیلنے والے مہلک کانگو وائرس کو مؤثر طور پر روکا جا سکے۔ انہوں نے زور دیا کہ مویشیوں کی نقل و حرکت کے دوران ہر جانور پر اسپرے یقینی بنایا جائے جبکہ چیک پوسٹوں پر صفائی، ماسک اور دستانوں کے استعمال سمیت دیگر حفاظتی اصولوں پر سختی سے عمل کیا جائے۔ انہوں نے کہا کہ محکمہ لائیوسٹاک عوام اور جانوروں کی صحت کے تحفظ کے لیے ہمہ وقت کوشاں ہے اور کانگو جیسے خطرناک امراض سے بروقت بچاؤ کو یقینی بنانے کے لیے ہر ممکن اقدامات کیے جا رہے ہیں۔