عائشہ خان کی المناک کہانی : اداکارہ کئی سالوں سے تنہائی کا شکارتھیں

کراچی (اُردو پوائنٹ اخبارتازہ ترین - آن لائن۔ 23 جون2025ء) سینئر اداکارہ عائشہ خان کی زندگی کا آخری باب بیحد دکھ بھرا ثابت ہوا، وہ کئی برسوں سے تنہائی میں زندگی گزار رہی تھیں اور ان کا انتقال بھی ایسی خاموشی میں ہوا کہ ایک ہفتے تک کسی کو خبر تک نہ ہوئی۔اداکارہ کے افسوسناک انتقال نے پاکستانی عوام کو گہرے دکھ میں مبتلا کر دیا ہے۔مداح ان کی المناک موت پر سوگوار ہیں، خصوصا اس دل دہلا دینے والے انداز پر جس میں وہ دنیا سے رخصت ہوئیں، تنہائی میں، گوشہ نشینی کے عالم میں اور ایک ہفتے تک کسی کو ان کی موت کی خبر تک نہ ہوسکی، یہاں تک کہ ان کی لاش بھی خراب حالت میں ملی۔

عائشہ خان کے انتقال نے سوشل میڈیا پر ایک نئی بحث کا آغاز کردیا ہے۔صحافی سارہ حسین کا ایک مضمون انٹرنیٹ پر گردش کر رہا ہے، جس میں انہوں نے اس واقعے پر تفصیل سے روشنی ڈالی ہے۔

(جاری ہے)

حال ہی میں فرح اقرار نے یوٹیوب پر ایک ویڈیو جاری کی، جس میں انہوں نے لیجنڈری اداکارہ عائشہ خان کے انتقال پر تفصیلی گفتگو کی۔فرح اقرار نے کہا کہ افسوسناک بات یہ ہے کہ عائشہ خان کی تدفین اب تک ممکن نہیں ہوسکی، کیونکہ ان کی اولاد ابھی تک میت وصول کرنے نہیں آئی، یہی وجہ ہے کہ تدفین میں تاخیر ہو رہی ہے۔

انہوں نے اپنی ویڈیو میں صحافی سارہ حسین کی اس وائرل تحریر کا حوالہ دیا، جس میں سارہ نے لکھا کہ اچھا ہوا آپا کا انتقال ہوگیا۔بعد ازاں انہوں نے اس جملے کی وضاحت بھی پیش کی کہ ایسا انہوں نے کیوں کہا۔فرح اقرار کے مطابق سارہ حسین کی تحریر میں لکھا تھا کہ عائشہ خان کا انتقال تو پہلے ہی ہوچکا تھا، کیونکہ وہ جس گھر میں رہتی تھیں، وہاں تنہا زندگی گزار رہی تھیں، گویا زندگی کا مفہوم ان کے لیے ختم ہو چکا تھا۔

سارہ حسین نے لکھا کہ مرحومہ نے تقریبا 15 سال قبل اپنی جائیداد اپنی اولاد میں تقسیم کردی تھی، جس کے بعد وہ مکمل طور پر تنہا ہوگئی تھیں اور دنیا سے ان کی دلچسپی ختم ہوگئی تھی۔فرح اقرار نے اپنی ویڈیو میں مزید بتایا کہ کچھ عرصہ قبل عائشہ خان کی ملاقات اداکار طلعت حسین سے ہوئی تھی، جس دوران وہ زاروقطار رونے لگیں۔سارہ حسین کی تحریر میں یہ بھی درج ہے کہ اداکارہ نے طلعت حسین کو بتایا تھا کہ وہ قید تنہائی میں ہیں، اپنے بچوں کو بہت یاد کرتی ہیں، مگر ان میں سے کوئی ان سے ملنے نہیں آتا، یہاں تک کہ ان کے پاس فون پر بات کرنے کا وقت بھی نہیں ہے۔

تحریر کے مطابق مرحومہ کا ایک بیٹا کراچی میں اور دوسرا اسلام آباد میں رہائش پذیر ہے، تاہم بچوں کے نام ظاہر نہیں کیے گئے۔فرح اقرار نے کہا کہ سوشل میڈیا پر عائشہ خان کی اولاد کے حوالے سے مختلف قیاس آرائیاں گردش کر رہی ہیں، کچھ کا کہنا ہے کہ ان کا ایک بیٹا اور ایک بیٹی ہے، جب کہ دیگر کا دعوی ہے کہ ان کے دو بیٹے اور ایک بیٹی ہیں۔مزید برآں، فرح اقرار نے بتایا کہ سارہ حسین کی تحریر میں یہ بھی ذکر ہے کہ اداکارہ غریبوں کی باقاعدگی سے مدد کیا کرتی تھیں، وہ مستحقین کی ایک فہرست تیار رکھتی تھیں اور اس میں درج تمام افراد کی مدد بھی کیا کرتی تھیں۔