خیبرپختونخوا میں محرم الحرام کے دوران امن و امان برقرار رکھنے کے لئے جامع اقدامات

پیر 23 جون 2025 20:40

پشاور (اُردو پوائنٹ اخبارتازہ ترین - اے پی پی۔ 23 جون2025ء) صوبائی حکومت نے محرم الحرام کے دوران امن و امان برقرار رکھنے کے لئے جامع اقدامات کئے ہیں اس سلسلہ میں یکم محرم سے یوم عاشور کے دوران تمام حساس اضلاع میں دفعہ ٍ144 کا نفاذ کرنے ،اسلحہ کی نمائش اور فرقہ وارانہ سرگرمیوں پر پابندیاں لگانے کی منصوبہ بندی کی گئ ہے۔ محکمہ داخلہ خیبرپختونخوا کے حکام نے بتایا کہ خیبر پختونخوا کے باہر کے علاقوں سے ذاکرین کی کی صوبہ میں داخلہ پر بھی پابندی عائد کی جائے گی، علاوہ ازیں صو بہ سے بھی بعض شخصیات کے باہر جانے پر بھی پابندی عائد ہوگی۔

اس کے علاوہ اشتعال انگیز نعروں اور جلوسوں کے راستوں پر واقع مکانات یا دکانوں کی چھتوں پر اسلحہ لے کر کھڑا ہونے پر بھی پابندی ہوگی شہروں میں موٹر سائیکل کی ڈبل سواری پر پابندی عائد ہوگی جبکہ شہر کے مختلف مقامات پر ہر قسم کے ہتھیار کی نمائش پر بھی پابندی عائد ہوگی ۔

(جاری ہے)

محکمہ داخلہ خیبرپختونخوا کے حکام نے بتایا کہ26یا27جون سے محرم کا پہلا عشرہ شروع ہونے کی توقع ہے، رویت ہلال کمیٹی کی جانب سے اعلان کے بعد مذکورہ پابندیوں کا صوبائی سطح پر نوٹیفکیشن جاری کیا جائے گا، جس کی روشنی میں متعلقہ ڈپٹی کمشنرز اور ڈی پی اوز بھی ہدایات جاری کریں گے۔

یکم محرم سے یوم عاشور تک کے دوران تمام حساس اضلاع میں دفعہ ٍ144 کا نفاذ کرنے، اسلحہ کی نمائش اور فرقہ وارانہ سرگرمیوں پر پابندیاں لگانے کی منصوبہ بندی کی گئی ہے۔