ملک کے بڑے دریاؤں اور آبی ذخائر میں پانی کی صورتحال مستحکم، تربیلا اور منگلا میں ذخیرہ تسلی بخش

جمعہ 22 اگست 2025 21:07

اسلام آباد (اُردو پوائنٹ اخبارتازہ ترین - آن لائن۔ 22 اگست2025ء) واپڈا کے ترجمان کے مطابق ملک کے اہم دریاؤں اور آبی ذخائر میں پانی کی آمد و اخراج کی صورتحال تسلی بخش ہے جبکہ تربیلا، منگلا اور چشمہ ریزروائر میں قابلِ استعمال پانی کا مجموعی ذخیرہ ایک کروڑ 14 لاکھ 9 ہزار ایکڑ فٹ تک پہنچ گیا ہے۔ ترجمان واپڈا نے بتایا کہ تربیلا کے مقام پر دریائے سندھ میں پانی کی آمد ایک لاکھ 65 ہزار 400 کیوسک جبکہ اخراج ایک لاکھ 65 ہزار کیوسک ریکارڈ کیا گیا ہے۔

منگلا ڈیم میں دریائے جہلم کی آمد 29 ہزار 800 کیوسک اور اخراج 7 ہزار کیوسک ہے۔ اسی طرح چشمہ بیراج میں پانی کی آمد 3 لاکھ 17 ہزار 100 کیوسک اور اخراج 2 لاکھ 37 ہزار 800 کیوسک رہا۔ ہیڈ مرالہ پر دریائے چناب کی آمد 57 ہزار کیوسک جبکہ اخراج 38 ہزار 300 کیوسک ہے۔

(جاری ہے)

نوشہرہ میں دریائے کابل میں آمد اور اخراج دونوں 39 ہزار 900 کیوسک ریکارڈ کیے گئے۔ترجمان کے مطابق تربیلا ریزروائر میں آج پانی کی سطح 1550.00 فٹ ہے اور پانی کا ذخیرہ 57 لاکھ 28 ہزار ایکڑ فٹ ہے۔

منگلا ریزروائر میں پانی کی سطح 1218.10 فٹ اور ذخیرہ 54 لاکھ 69 ہزار ایکڑ فٹ ریکارڈ کیا گیا ہے، جبکہ چشمہ ریزروائر میں پانی کی سطح 647.00 فٹ اور ذخیرہ دو لاکھ 12 ہزار ایکڑ فٹ ہے۔ترجمان واپڈا کا کہنا ہے کہ دریائے سندھ (تربیلا، چشمہ)، دریائے جہلم (منگلا) اور دریائے کابل (نوشہرہ) پر پانی کی آمد و اخراج کی معلومات گزشتہ 24 گھنٹوں کے اوسط بہاؤکی بنیاد پر دی گئی ہیں۔ ماہرین کے مطابق موجودہ ذخائر زرعی ضروریات اور بجلی کی پیداوار کے لیے موزوں سطح پر ہیں، تاہم مون سون کے دوران پانی کی سطح پر کڑی نظر رکھی جا رہی ہے۔