چین ایران کو آبنائے ہرمز بند کرنے سے روکے،امریکہ

آبنائے ہرمز کوبندکیاتوایران کو اس کے نتائج بھگتنا ہوں گے،وزیرخارجہ

منگل 24 جون 2025 14:48

بیجنگ (اُردو پوائنٹ اخبارتازہ ترین - این این آئی۔ 24 جون2025ء)امریکہ کے وزیر خارجہ مارکو روبیو نے چین پر زور دیا ہے کہ وہ ایران کو آبنائے ہرمز بند کرنے سے باز رکھنے میں کردار ادا کرے، کیونکہ یہ اقدام امریکی فضائی حملوں کے ردعمل میں ایران کی جانب سے متوقع ردعمل کے طور پر سامنے آ سکتا ہے۔

(جاری ہے)

میڈیارپورٹس کے مطابق مارکو روبیو نے کہاکہ میں بیجنگ میں چینی حکومت سے اپیل کرتا ہوں کہ وہ اس معاملے پر ایران سے بات کرے، کیونکہ چین اپنی تیل کی فراہمی کے لیے آبنائے ہرمز پر بری طرح انحصار کرتا ہے۔

روبیو نے مزید کہاکہ اگر ایران نے ایسا کیا تو یہ ایک اور سنگین غلطی ہوگی۔ یہ ان کے لیے معاشی خودکشی کے مترادف ہوگا۔ ہمارے پاس اس سے نمٹنے کے کئی آپشن موجود ہیں۔انہوں نے متنبہ کیا کہ دیگر ممالک کو بھی اس معاملے پر سنجیدگی سے غور کرنا چاہیے، کیونکہ اس کے نتائج ان کی معیشتوں پر امریکہ سے کہیں زیادہ منفی پڑیں گے۔ میں سمجھتا ہوں کہ یہ ایک بہت بڑا اشتعال انگیز اقدام ہوگا، جس کا ردعمل صرف ہماری جانب سے نہیں، بلکہ دیگر ممالک کی طرف سے بھی آ سکتا ہے۔