کینگروز کو ویسٹ انڈیز کے خلاف پہلے ٹیسٹ کے دوسرے روز دوسری اننگز میں 4 وکٹوں کے نقصان پر 92رنز کے ساتھ مجموعی 82رنز کی برتری حاصل

جمعہ 27 جون 2025 16:24

بارباڈوس (اُردو پوائنٹ اخبارتازہ ترین - اے پی پی۔ 27 جون2025ء) ویسٹ انڈیز کی ٹیم بارباڈوس ٹیسٹ ٹیسٹ میچ کے دوسرے دن اپنی پہلی اننگز میں 190 رنز بناکر پویلین لوٹ گئی ،آسٹریلیا نے میچ کے اختتام تک اپنی دوسری اننگز میں 4 وکٹوں کے نقصان پر 92 رنز بنالئے اور اس کو میزبان ٹیم کے خلاف 82 رنز کی مجموعی برتری حاصل ہوگئی تھی۔ کینسنگٹن اوول، برج ٹاؤن، بارباڈوس میں جاری تین میچوں کی سیریز کے پہلے ٹیسٹ میچ کے دوسرے روز ویسٹ انڈیز ٹیم نے اپنی پہلی ادھوری اننگز 57 رنز 4 کھلاڑی آئوٹ پر دوبارہ شروع کی تو برینڈن کنگ 23 اور کپتان روسٹن چیس ایک رن کے ساتھ ناٹ آئوٹ تھے۔

برینڈن کنگ اپنے گزشتہ روز کے انفرادی سکور میں تین رنز کا اضافہ کرنے کے بعد 26 رنز بناکر کلین بولڈ ہوگئے ،ان کو جوش ہیزلووڈنے اپنی گیند کا نشانہ بنایا،ان کے بعد کپتان روسٹن چیس 44 رنز بناکر پیٹ کمنز کی گیند پر ایل بی ڈبلیو آئوٹ ہوگئے،جسٹن گریوز4،شائی ہوپ48،سیمرجوزف8 اور جیڈن سیلز 2 رنز بناکر آئوٹ ہوگئے۔

(جاری ہے)

الزاری جوزف 23 رنز کے ساتھ ناٹ آئوٹ رہے۔

یوں میزبان ٹیم آسٹریلوی اننگز کے سکور 180کے جواب میں 10 رنز کی برتری کے ساتھ 190 رنز بناکر آئوٹ ہوگئی۔آسٹریلیا کی طرف سے مچل سٹارک نے تین، پیٹ کمنز،جوش ہیزلووڈ اور بیو ویبسٹر نے دو، دو کھلاڑیوں کوآئوٹ کیا۔نیتھن لیون نے ایک وکٹ حاصل کی۔جواب میں آسٹریلیا کی جانب سے ثام کونسٹاس اور عثمان خواجہ نے ایک مرتبہ پھر مایوس کن آغاز فراہم کیا۔

ثام کونسٹاس 5 اور عثمان خواجہ 15 رنز بناکر پویلین لوٹ گئے،جوش انگلیس 12 اور کیمرون گرین 15 رنز بناکر آئوٹ ہوگئے۔ میچ کے دوسرے روز جب کھیل ختم ہوا تو آسٹریلیا کی ٹیم نے اپنی دوسری اننگز میں 4 وکٹوں کے نقصان پر 92 رنز بنالئے تھے اور اس کو ویسٹ انڈیز کے خلاف 82 رنز کی مجموعی برتری حاصل ہوگئی تھی۔ ٹراوس ہیڈ 13 اور بیو ویبسٹر 19 رنز کے ساتھ ناٹ آئوٹ ہیں۔ ویسٹ انڈیز کی جانب سے جیڈن سیلز،شمر جوزف،الزاری جوزف اور جسٹن گریوزنے ایک، ایک کھلاڑی کو آئوٹ کیا۔\932