پنجاب ایجوکیشن کریکولم اتھارٹی کی سنگین غلطی، کیمسٹری کی کتاب میں لال قلعہ دہلی کی تصویر شائع کردی

یہ تصویر فرسٹ ایئر کی کیمسٹری کی اس کتاب میں شامل ہے جسے سرکاری سطح پر تعلیمی اداروں میں پڑھایا جا رہا ہے

ساجد علی اتوار 29 جون 2025 11:04

پنجاب ایجوکیشن کریکولم اتھارٹی کی سنگین غلطی، کیمسٹری کی کتاب میں ..

لاہور ( اُردو پوائنٹ اخبارتازہ ترین۔ 29 جون2025ء ) پنجاب ایجوکیشن کریکولم اتھارٹی نے سنگین غلطی کرتے ہوئے کیمسٹری کی کتاب میں لال قلعہ دہلی کی تصویر شائع کردی۔ میڈیا رپورٹس کے مطابق پنجاب ایجوکیشن کریکولم، ٹریننگ اینڈ اسیسمنٹ اتھارٹی (پیکٹا) کی جانب سے فرسٹ ایئر کی کیمسٹری کی نصابی کتاب میں ایک حیرات انگیز اور سنگین غلطی سامنے آئی ہے جہاں ماحولیات کے باب میں سموگ کے اثرات بیان کرتے ہوئے شاہی قلعہ لاہور کی جگہ دہلی کے مشہور لال قلعہ کی تصویر شائع کردی گئی۔

بتایا گیا ہے کہ یہ تصویر کیمسٹری کی اس کتاب میں شامل ہے جسے سرکاری سطح پر تعلیمی اداروں میں پڑھایا جا رہا ہے، تصویر کے نیچے دہلی کے لال قلعہ کو شاہی قلعہ لاہور لکھ دیا گیا ہے، ماحولیاتی آلودگی اور سموگ کے بارے میں مضمون میں مقامی سیاق و سباق کی بجائے بھارتی تاریخی ورثے کی تصویر شائع کرنے پر تعلیمی حلقوں اور ماہرین نے شدید تحفظات کا اظہار کردیا۔

(جاری ہے)

معلوم ہوا ہے کہ اس معاملے پر پیکٹا حکام کی جانب سے تاحال اس سنگین غلطی پر کوئی باضابطہ وضاحت یا معذرت سامنے نہیں آئی، تاہم صوبائی وزیر تعلیم رانا سکندر حیات نے کتاب میں غلط تصویر چھاپنے پر انکوائری کا حکم دے دیا، اس ضمن میں انہوں نے کہا ہے کہ انکوائری کے بعد حقائق سامنے آنے پر کارروائی کریں گے۔