Live Updates

صوبائی وزیر اوقاف چوہدری شافع حسین کی زیر صدارت پیسک ہاؤس میں اجلاس

منگل 1 جولائی 2025 16:09

لاہور (اُردو پوائنٹ اخبارتازہ ترین - این این آئی۔ 01 جولائی2025ء)صوبائی وزیر اوقاف ومذہبی امور چوہدری شافع حسین کی زیر صدارت پیسک ہاؤس میں اہم اجلاس منعقدہوا۔اجلاس میں محکمہ اوقاف کی زمینوں پر ناجائز قبضوں کے خاتمے کے ایکشن پلان کی منظوری دی گئی۔محکمہ اوقاف کی 8102 ایکڑ اراضی ناجائز قابضین سے واگزار کرانے کے لئے پلان تیار کرلیا گیا۔اجلاس میں فیصلہ کیاگیاکہ محکمہ اوقاف کی تمام اراضی کی ڈیجیٹائزیشن کی جائے گی،سرکاری اداروں کے زیر تسلط اراضی واگزار کرانے کیلئے اداروں کے سربراہان کو خطوط لکھے جائیں گے،اراضی کے لیگل کیسز جلد نمٹانے کے لئے مکمل فالو اپ کیا جائے گا،محکمہ اوقاف کے بورڈ کی منظوری سے رہائشی اور رینٹل قبضوں والی اراضی کے حوالے سے ریگولرائزیشن کی پالیسی لائی جائے گی اور اوقاف کی زمینوں کو واگزار کرانے کے لئے خصوصی کمیٹی تشکیل دی جائے گی۔

(جاری ہے)

صوبائی وزیر اوقاف چوہدری شافع حسین نے اس موقع پر گفتگو کرتے ہوئے کہاکہ محکمہ اوقاف کی زمینوں کو ناجائز قابضین سے واگزار کراکے عوام کے فلاحی منصوبوں کے لئے استعمال میں لایا جائے گا۔اوقاف کی زمینوں پر سعودی عرب کے سرمایہ کار سرمایہ کاری کے خواہاں ہیں۔چوہدری شافع حسین نے کہاکہ پنجاب بھر میں اوقاف کے زیر اہتمام مساجد اور مزارات کی تزئین آرائش کی جارہی ہے۔

محکمہ اوقاف کی ترقیاتی سکیموں کے لئے رواں مالی سال کے بجٹ میں 3 ارب روپے مختص کئے گئے ہیں۔صوبائی وزیراوقاف نے ہدایت کی کہ تمام مزارات پر سی سی ٹی وی کیمروں کی تنصیب یقینی بنائی جائے۔ سکیورٹی کمپنیوں کے اہلکاروں کی تنخواہوں میں اضافے کیلئے خطوط لکھے جائیں۔پاکپتن شرائن کی لائبریری سے بھرپور استفادہ کرنے کیلئے اقدامات اٹھائے جائیں اورمحکمہ اوقاف کی ہیلتھ سروسز کو بہتر کیا جائے۔سیکرٹری اوقاف ڈاکٹر طاہر رضا بخاری ، ایڈوائزر محکمہ اوقاف کامران عثمانی ،ڈی جی اوقاف اور محکمہ اوقاف کے ڈائریکٹرز نے اجلاس میں شرکت کی۔