محکمہ زراعت کی جانب سے کپاس کی فصل کی بہتر مینجمنٹ کیلئے حکمت عملی جاری

جمعرات 3 جولائی 2025 13:14

فیصل آباد (اُردو پوائنٹ اخبارتازہ ترین - اے پی پی۔ 03 جولائی2025ء) محکمہ زراعت نے کپاس کی فصل کی بہتر مینجمنٹ کیلئے حکمت عملی جاری کی ہے۔ڈائریکٹر محکمہ زراعت توسیع فیصل آباد چوہدری خالد محمود نے کہا کہ کاشتکار جڑی بوٹی مار سپرے کیلئے فلیٹ فین نوزل استعمال کریں اور پانی کی مقدار 100 تا 120 لیٹر فی ایکڑ استعمال کریں اور ایسی زہریں جن کے استعمال سے فصل کو نقصان پہنچے کا اندیشہ ہو شیلڈ لگا کر سپرے کریں جبکہ آبپاشی کا وقفہ واٹر سکاؤٹنگ کر کے کم یا زیادہ کیا جا سکتا ہے۔

انہوں نے کہا کہ لائنوں میں کاشتہ کپاس کی فصل کو 12 تا 15 دن کے وقفے سے آبپاشی کریں جب کہ پٹڑیوں پر کاشتہ کپاس کی فصل کو 15 دن بعد پانی لگائیں اور بقیہ پانی بھی 15 دن کے وقفے سے لگائیں نیزکپاس کی فصل پر زنک اور بوران کی کمی کی علامات ظاہر ہونے پر ان کے تین سپرے بوائی کے بالترتیب 60،45 اور 90 دن بعد کریں۔

(جاری ہے)

سپرے کا محلول بنانے کیلئے 100 لیٹر پانی میں بورک ایسڈ 17 فیصد بحساب 300 گرام،زنک سلفیٹ33 فیصد بحساب 250 گرام حل کریں۔

زنک اور بوران کو دوسرے کیڑے مار ادویات کے ساتھ ملا کر سپرے نہ کریں۔انہوں نے کہا کہ حالیہ نمی والے موسم میں کپاس کی فصل پر رس چوسنے والے کیٹروں کا حملہ خصوصاً چست تیلے اور سفید کبھی کے حملے کا خطرہ بڑھ جاتا ہے اس لئے کاشتکار کپاس کی فصل کی ہفتہ میں دو بار پیسٹ سکاؤٹنگ کریں اور اگر کوئی ضرر رساں کیڑا نقصان کی معاشی حد سے تجاوز کرے تو محکمہ زراعت پنجاب کے مقامی زرعی ماہرین کے مشورے سے نئی کیمسٹری کی حامل زہروں کا سپرے کریں۔انہوں نے یہ بھی بتایا کہ فصل کو حسب ضرورت نائٹروجنی کھادمناسب وقفے سے سفید کبھی کے حملے کی شدت دیکھتے ہوئے ڈالی جائے۔ اگر کپاس کی فصل پر سفید مکھی کا حملہ زیادہ ہوتو نائٹروجنی کھاد کا استعمال سفید مکھی کے حملے کے بعد کریں۔