سیکنڈ سیڈڈ کارلوس الکارازکی پیش قدمی جاری ،ومبلڈن اوپن ٹینس مینز سنگلز کے تیسرےرائونڈ میں داخل

جمعرات 3 جولائی 2025 16:04

لندن (اُردو پوائنٹ اخبارتازہ ترین - اے پی پی۔ 03 جولائی2025ء) سپین کے شہرت یافتہ ٹینس سٹار ، سیکنڈ سیڈڈ اور دفاعی چیمپئن کارلوس الکاراز ،امریکا کے ٹینس کھلاڑی ٹیلر فریٹز،روسی ٹینس سٹار آندرے روبلوف ،انگلینڈ کے کیمرون نوری اور روس کے ہی کیرن خچانوف اپنی پیش قدمی کو جاری رکھتے ہوئے ومبلڈن اوپن ٹینس میں مردوں کے سنگلز مقابلوں کے تیسرے رائونڈ میں پہنچ گئے جبکہ کے ٹینس کھلاڑی فرانسس ٹیافو جونیئر مینز سنگلز کے دوسرے رائونڈ میں اپ سیٹ شکست کے بعد میگا ایونٹ سے باہر ہوگئے۔

ہسپانوی ٹینس سٹار اور دفاعی چیمپئن کارلوس الکاراز نے مردوں کے سنگلز مقابلوں کے دوسرے رائونڈ میں میزبان حریف کھلاڑی اولیور ٹاروٹ کو مات دے کر تیسرے رائونڈ کے لئے کوالیفائی کیا۔

(جاری ہے)

سال کے تیسرے گرینڈ سلام ومبلڈن اوپن ٹینس کے دلچسپ مقابلے انگلینڈ میں شروع ہوچکا ہے جس میں شائقین ٹینس کو انتہائی دلچسپ اور کانٹے دار مقابلے دیکھنے کا موقع ملیں گے ۔

پانچ گرینڈ سلام ٹائٹلز کے چیمپئن اور میگا ایونٹ کے دفاعی چیمپئن 22 سالہ ہسپانوی ٹینس سٹار کارلوس الکاراز نے عمدہ کھیل پیش کرتے ہوئے برطانوی حریف کھلاڑی اولیور ٹاروٹ کوسٹریٹ سیٹس 1-6، 4-6 اور 4-6 سے شکست دے کر نہ صرف ایونٹ سے باہر کر دیا بلکہ تیسرے رائونڈ کے لئے بھی کوالیفائی کرلیا ۔ ایک اور میچ میں امریکا کے ٹینس کھلاڑی ٹیلر فریٹز نے بھی دوسری رکاوٹ عبور کرلی ،انہوں نے مینز سنگلز دوسرے رائونڈ میچ میں کینیڈا کے حریف کھلاڑی گیبریل ڈیالو کو سخت مقابلے کے بعد 6-3، 3-6، 6-7(0-7)،6-4 اور 3-6 سے شکست دے کر ٹورنامنٹ کے تیسرے رائونڈ تک رسائی حاصل کی ۔

دوسرے رائونڈ کے دیگر میچز میں روسی ٹینس سٹار آندرے روبلوف ،انگلینڈ کے کیمرون نوری اور روس کے ہی کیرن خچانوف نے فتح حاصل کر کے تیسرے رائونڈ کے لئے کوالیفائی کرلیا ۔ \932