پاکستان کا ایشیا کپ کیلئے ہاکی ٹیم کو بھارت نہ بھیجنے کا امکان

ٹیم کو بھارت نہ بھیجنے کا فیصلہ کشیدہ تعلقات اور ٹیم کو لاحق سیکیورٹی خدشات کے پیشِ نظر کیا جائے گا، ذرائع

ہفتہ 12 جولائی 2025 22:56

پاکستان کا ایشیا کپ کیلئے ہاکی ٹیم کو بھارت نہ بھیجنے کا امکان

اسلام آباد (اُردو پوائنٹ اخبارتازہ ترین - این این آئی۔ 12 جولائی2025ء)پاکستان کی جانب سے ایشیا کپ کے لیے ہاکی ٹیم کو بھارت نہ بھیجنے کا امکان ہے۔ذرائع نے بتایا کہ ٹیم کو بھارت نہ بھیجنے کا فیصلہ کشیدہ تعلقات اور ٹیم کو لاحق سیکیورٹی خدشات کے پیشِ نظر کیا جائے گا۔واضح رہے کہ 3 جولائی کو بھاررتی حکومت نے پاکستان ہاکی ٹیم کے کھلاڑیوں کو ایشیا کپ میں شرکت کے لیے ویزے جاری کرنے کی منظوری دے دی تھی۔

بھارتی میڈیا نے رپورٹ کیا تھا کہ پاکستان ہاکی ٹیم ایشیا کپ میں شرکت کرے گی، قومی ٹیم بھارت کے شہر راجگیر، بہار میں ایشیا کپ میں شرکت کرے گی۔واضح رہے کہ ایشیا کپ ہاکی 27 اگست سے 7 ستمبر 2025 تک بھارت میں شیڈول ہے۔ادھر، پاکستان ہاکی فیڈریشن نے این او سی کے لیے حکومت سے کلئیرنس مانگ لی تھی۔

(جاری ہے)

رپورٹ کے مطابق پاکستان اسپورٹس بورڈ نے ہاکی فیڈریشن کی درخواست وزارت داخلہ کو بھجوادی تھی۔

بھارت میں پاکستانی ہاکی ٹیم کی شرکت کے حوالے سے سوال کیا گیا جس پر ترجمان پاکستان اسپورٹس بورڈ نے بتایا تھا کہ پاکستان ہاکی فیڈریشن کی جانب سے 12 جون کو درخواست موصول ہوئی کہ بھارت میں 25 اگست سی7 ستمبر تک ایشیا ہاکی کپ مینز منعقد ہورہا ہے، یہ ہاکی ورلڈ کپ کا کوالیفائنگ ٹورنامنٹ ہے۔درخواست میں کہا گیا تھا کہ پاک بھارت موجودہ صورتحال کے تناظر میں حکومت پاکستان بتائے کہ قومی ہاکی ٹیم بھارت جاسکتی ہے یا نہیں۔