ٹاپ اینڈ ٹی ٹوئنٹی سیریز کے لیے 15 رکنی پاکستانی سکواڈ کا اعلان ،محمد عرفان خان قیادت کریں گے،پی سی بی

ہفتہ 12 جولائی 2025 15:43

لاہور (اُردو پوائنٹ اخبارتازہ ترین - اے پی پی۔ 12 جولائی2025ء) پاکستان کرکٹ بورڈ نے ٹاپ اینڈ ٹی ٹوئنٹی سیریز کے لیے 15 رکنی پاکستان شاہینز اسکواڈ کا اعلان کر دیا ہے جس کی قیادت محمد عرفان خان کریں گے،وہ اب تک پاکستان کی جانب سے 9 ون ڈے اور 14 ٹی ٹوئنٹی انٹرنیشنل میچز کھیل چکے ہیں،یہ بین الاقوامی ٹورنامنٹ 14 اگست سے 24 اگست تک آسٹریلیا کے شہر ڈارون میں کھیلا جائے گا جس میں 11 ٹیمیں حصہ لیں گی۔

پاکستان شاہینز اپنا افتتاحی میچ 14 اگست کو بنگلہ دیش 'اے' کے خلاف ٹی آئی او سٹیڈیم میں کھیلے گی۔اعلان کردہ 15 رکنی سکواڈ میں محمد عرفان خان کپتان، عبدالصمد ، احمد دانیال، فیصل اکرم، حیدر علی، معاذ صداقت، مہران ممتاز، خواجہ محمد نافع وکٹ کیپر، محمد غازی غوری وکٹ کیپر، مبصر خان، سعد مسعود، محمد سلمان مرزا، شاہد عزیز، عبید شاہ اور یاسر خان شامل ہیں، کئی ایسے کھلاڑی بھی شامل ہیں جو ماضی میں قومی ٹیم کی نمائندگی کر چکے ہیں، ان میں عبدالصمد، فیصل اکرم، حیدر علی، مبصر خان اور دیگر شامل ہیں، احمد دانیال اور محمد سلمان مرزا حالیہ بنگلہ دیش سیریز کے لیے پاکستان ٹی ٹوئنٹی سکواڈ کا بھی حصہ ہیں۔

(جاری ہے)

ٹورنامنٹ میں شاہینز مجموعی طور پر چھ گروپ میچز کھیلیں گے جن میں 16 اگست کو اسکورچرز، 18 اگست کو رینیگیڈز، 19 اگست کو کنگز مین، 20 اگست کو سٹرائیکرز اور 22 اگست کو نیپال کے خلاف مقابلے شامل ہیں۔ سیمی فائنلز اور فائنل 24 اگست کو کھیلے جائیں گے۔ٹیم مینجمنٹ میں غلام علی ہیڈ کوچ کے فرائض انجام دیں گے جبکہ سمیع اللہ نیازی بولنگ کوچ، منصور امجدفیلڈنگ کوچ، محمد ابراہیم تجزیہ کار اور محمد علیم فزیو اسکواڈ کے ہمراہ ہوں گے۔پی سی بی کے مطابق ڈارون جانے والے سکواڈ کے لیے تربیتی کیمپ کا اعلان بعد میں کیا جائے گا۔ \932