دھان کی بہتر پیداوار کیلئے محکمہ زراعت کی سفارشات جاری

پیر 7 جولائی 2025 18:23

سیالکوٹ (اُردو پوائنٹ اخبارتازہ ترین - اے پی پی۔ 07 جولائی2025ء) محکمہ زراعت پنجاب نے دھان کی بہتر پیداوار کیلئے سفارشات جاری کر دی ہیں۔اس حوالے سے اسسٹنٹ ڈائریکٹر محکمہ زراعت توسیع سیالکوٹ رانا سلیم شاد نے بتایا کہ کاشتکارچاول کی اچھی پیداوار کے لیے کھیت میں پنیری منتقل کرنے سے پہلے 10 تا 15 دن تک پانی کھڑا رکھیں اور پھر کدو کریں جبکہ پانی کی کمی کی صورت میں کدو کرنے کے لیے کھیت میں 7 دن تک پانی کھڑا کیا جائے اور پانی کی شدید کمی کی صورت میں کم از کم3 دن تک پانی کھڑا رکھیں۔

(جاری ہے)

دھان کی بہترین پیداوار کے حصول کے لیے زمین کو اچھی طرح ہموار کریں۔ انہوں نے مزید کہا کہ دھان کے کاشتکار پودوں کی فی ایکٹر تعداد 1 لاکھ 60 ہزار رکھیں یعنی پودوں اور لائنوں کا باہمی فاصلہ 9 انچ رکھتے ہوئے 80 ہزار سوراخوں میں فی سوراخ 2 پودے لگائیں۔زنک کی کمی دور کرنے کے لیے جو کاشتکار پنیری میں زنک سلفیٹ استعمال نہیں کر سکے وہ لاب لگانے کے 10 دن بعد تک 33 فیصد والا زنک سلفیٹ 6 کلو گرام یا 27 فیصد والا ز نک سلفیٹ 7.5 کلوگرام یا 21 فیصد والا زنک سلفیٹ 10 کلوگرام فی ایکٹرڈالیں تاکہ بہتر پیداوار کا حصول ممکن ہو سکے۔