ایشیائی ترقیاتی بینک کے وفد کا جامعہ زرعیہ کا دورہ،مختلف امور بارے تبادلہ خیال کیا

منگل 8 جولائی 2025 16:10

فیصل آباد (اُردو پوائنٹ اخبارتازہ ترین - اے پی پی۔ 08 جولائی2025ء) ایشیائی ترقیاتی بینک کی سینئر نیچرل ریسورس اینڈ ایگریکلچر سپیشلسٹ نوریکو ساتو اور پرنسپل کومشن لیڈر شینگوکیمورا نے زرعی یونیورسٹی فیصل آباد کا دورہ کیا اور وائس چانسلر پروفیسر ڈاکٹر ذوالفقار علی سے ملاقات کی جس دوران زراعت کے شعبے اور غذائی تحفظ سے متعلق امور پر تبادلہ خیال کیا گیا۔

اس موقع پر ڈائریکٹر ریسرچ پروفیسر ڈاکٹر عمران ارشد اور پروفیسر ڈاکٹر جعفر جسکانی بھی موجود تھے۔ نوریکو ساتو نے زرعی شعبے میں ترقی اور غذائی عدم استحکام کے حل کے لیے زرعی یونیورسٹی کے اقدامات کو سراہا۔ انہوں نے کہا کہ اے ڈی بی پنجاب میں پانچ سالہ لوکاربن زرعی میکانزم پراجیکٹ میں معاونت کر رہا ہے جو سپیڈبریڈنگ، ہائی ٹیک لیب ٹریننگ اور گرین ہاؤس گیسز امیشن پیمائش پر مشتمل ہے۔

(جاری ہے)

پروفیسر ڈاکٹر ذوالفقار علی نے کہا کہ یونیورسٹی کا اے ڈی بی کے ساتھ طویل المدتی تعاون رہا ہے جو زرعی ترقی اور موسمیاتی تبدیلیوں سے نبردآزما ہونے کے لیے عملی اقدامات کر رہا ہے۔ انہوں نے کہا کہ زرعی شعبہ اس وقت ماحولیاتی تبدیلیوں، پانی کی کمی، زمین کی بگڑتی ہوئی صحت اور دیگر چیلنجز کا سامنا کر رہا ہے۔ ان کا کہنا تھا کہ زرعی تحفظ اور پائیدار بہتری کے لیے مشترکہ کوششیں وقت کی اہم ضرورت ہے۔