حکومت کا بیرون ملک سے چینی کی خریداری پر کروڑ ڈالرز خرچ کرنے کا فیصلہ

شوگر ملز کو 7 لاکھ ٹن چینی کی بیرون ملک فروخت کی اجازت دینے کے بعد اب وفاقی کابینہ نے 5 لاکھ میٹرک ٹن چینی درآمد کرنے کی منظوری دے دی

محمد علی منگل 8 جولائی 2025 18:10

اسلام آباد (اُردو پوائنٹ اخبارتازہ ترین۔ 08 جولائی2025ء) حکومت کا بیرون ملک سے چینی کی خریداری پر کروڑ ڈالرز خرچ کرنے کا فیصلہ، شوگر ملز کو 7 لاکھ ٹن چینی کی بیرون ملک فروخت کی اجازت دینے کے بعد اب وفاقی کابینہ نے 5 لاکھ میٹرک ٹن چینی درآمد کرنے کی منظوری دے دی۔ تفصیلات کے مطابق وفاقی کابینہ نے 5 لاکھ میٹرک ٹن چینی درآمد کرنے کی منظوری دے دی، ایک سال کے دوران ساڑھے 7 لاکھ میٹرک ٹن چینی برآمد کرنے کے بعد اب 5 لاکھ میٹرک ٹن چینی درآمد کرنے کا فیصلہ کیا گیا ہے۔

میڈیا رپورٹس کے مطابق وزارت غذائی تحفظ نے بتایا کہ چینی کی درآمد حکومتی شعبے کے ذریعے کی جائے گی، فیصلہ چینی کی قیمتوں میں استحکام لانے کے لیے کیا گیا ہے۔ وزارت غذائی تحفظ کی جانب سے جاری اعلامیہ کے مطابق چینی کی درآمد کے لیے تمام انتظامات مکمل کرلیے گئے ہیں، فوری عمل درآمد شروع کیا جا رہا ہے، چینی کی قیمتوں میں توازن برقرار رکھنے کے لیے یہ اقدام اٹھایا گیا ہے۔

(جاری ہے)

اعلامیہ کے مطابق چینی کی درآمد کا طریقہ ماضی کی حکومتوں سے مختلف اور واضح طور پر بہتر حکمت عملی کی نمائندگی کرتا ہے، ماضی میں اکثر چینی کی مصنوعی قلت پیدا کر کے قومی خزانے پر بوجھ ڈال کر سبسڈی پر انحصار کیا جاتا تھا- وزارت غذائی تحفظ کے مطابق موجودہ حکومت نے چینی برآمد کرنے کا فیصلہ اٴْس وقت کیا تھا، جب چینی وافر مقدار میں دستیاب تھی، اب چینی کی قیمتوں میں استحکام کے لیے چینی درآمد کی جا رہی ہے۔ واضح رہے کہ چینی کی ایکسپورٹ سے متعلق حکومتی کی نااہلی کی وجہ سے ملک میں چینی کی قیمت 200 روپے سے اوپر جا چکی۔ سابق وزیر خزانہ مفتاح اسماعیل کے مطابق حکومت کی جانب سے شوگر ملز کو چینی کی ایکسپورٹس کی اجازت دیے جانے کے بعد سے چینی 80 روپے مہنگی ہو چکی۔