سعودی کلب کی لیونل میسی کو پیشکش، رونالڈو کے ساتھ ایک ہی لیگ میں کھیلنے کا امکان

منگل 8 جولائی 2025 22:42

ریاض (اُردو پوائنٹ اخبارتازہ ترین - آن لائن۔ 08 جولائی2025ء)کرسٹیانو رونالڈو کی سعودی پرو لیگ نے لیونل میسی کو سعودی کلب الاہلی میں شمولیت کی حیران کن پیشکش کردی۔ فٹبال شائقئن لیونل میسی اور کرسٹیانو رونالڈو کے ایک ہی لیگ میں کھیلنے کے امکان پر پُرجوش ہیں۔انٹر میامی کے ساتھ لیونل میسی کا موجودہ معاہدہ 2025ء کے اختتام پر ختم ہو رہا ہے اور اسی تناظر میں مستقبل کے حوالے سے غیر یقینی صورتحال جاری ہے، اس موقع پر الاہلی کی پیشکش نے فٹبال مداحوں میں نئی امید پیدا کر دی ہے۔

اس پیشرفت نے دنیا بھر کے فٹبال شائقین کو پرجوش کر دیا ہے، جو ایک بار پھر دونوں لیجنڈری کھلاڑیوں کو ایک ہی لیگ میں آمنے سامنے دیکھنے کے خواہشمند ہیں۔یاد رہے کہ کرسٹیانو رونالڈو پہلے ہی سعودی کلب النصر کے ساتھ کھیل رہے ہیں اور حال ہی میں انہوں نے مزید 2 سال کے لیے اپنا معاہدہ بڑھا لیا ہے۔

(جاری ہے)

النصر نے 26 جون کو اس نئے معاہدے کی تصدیق کی، جس سے وہ 2026ء تک کلب کے ساتھ منسلک رہیں گے۔

ماضی میں یہ خبریں گردش کر رہی تھیں کہ رونالڈو فیفا کلب ورلڈ کپ میں کسی اور ٹیم میں شامل ہوں گے، لیکن رونالڈو نے ان افواہوں کی تردید کر دی تھی، جس سے مداح مایوس ہوگئے تھے۔تاہم اب میسی کو سعودی عرب لانے کی اس کوشش نے امید کی ایک نئی کرن پیدا کر دی ہے، اگرچہ الاہلی نے پیشکش کی تصدیق کی ہے، تاہم اب تک میسی کو دی جانے والی ممکنہ رقم یا مراعات کے بارے میں کوئی تفصیل سامنے نہیں آئی، لیکن یہ بات طے ہے کہ سعودی کلب میسی کو قائل کرنے کے لیے پرکشش ترین مالی پیکج کی پیشکش کر سکتا ہے۔

میسی اور رونالڈو دونوں ہی اب اپنی نگاہیں فیفا ورلڈ کپ 2026ء پر مرکوز کیے ہوئے ہیں، جو ان کے کیریئر کا ممکنہ آخری عالمی ٹورنامنٹ ہو سکتا ہے۔اگر لیونل میسی سعودی پرو لیگ کا حصہ بن جاتے ہیں، تو یہ ناصرف فٹبال کی تاریخ کا یادگار لمحہ ہو گا بلکہ ایک بار پھر دنیا کو میسی بمقابلہ رونالڈو کا کلاسک مقابلہ دیکھنے کو ملے گا۔