ایف پی سی سی آئی لاہور میں ایف بی آر ڈیجیٹل انوائسنگ پر آگاہی سیشن کا انعقاد

جمعہ 11 جولائی 2025 20:25

لاہور (اُردو پوائنٹ اخبارتازہ ترین - آن لائن۔ 11 جولائی2025ء) ایف پی سی سی آئی ریجنل آفس لاہور میں ’’ایف بی آر ڈیجیٹل انوائسنگ‘‘ پر آگاہی سیشن کا انعقاد کیا گیا، جس کی صدارت ریجنل چیئرمین و نائب صدر زین افتخار چودھری نے کی۔ سیشن میں کمشنر ان لینڈ ریونیو ایل ٹی او لاہور عبدالجواد، چیف ٹیکنالوجی و انفارمیشن آفیسر پی آر اے ایل محمد نعیم، سابق چیئرمین منظور الحق ملک، کنوینر کمیٹی حسیب اللہ خان اور دیگر تاجر و صنعتکار نمائندوں نے شرکت کی۔

(جاری ہے)

زین افتخار چودھری نے کہا کہ ایف بی آر کا ڈیجیٹل انوائسنگ سسٹم ٹیکس نظام میں ایک اہم اور جدید فیچر کا اضافہ ہے، جو نہ صرف شفافیت کو فروغ دے گا بلکہ کاروباری طبقے کو بین الاقوامی معیار سے ہم آہنگ کرنے میں بھی مدد فراہم کرے گا۔انہوں نے مزید کہا کہ اس سسٹم سے کاروباری لین دین کی خودکار دستاویز بندی ممکن ہو گی، جس سے ٹیکس گوشواروں کی درستگی اور نگرانی میں بہتری آئے گی۔ شرکاء نے بھی ایف بی آر کی جانب سے اٹھائے گئے اقدامات کو سراہا اور کہا کہ اس نوعیت کے سیشنز سے کاروباری برادری کو آگاہی حاصل ہوتی ہے، جو پالیسی پر عملدرآمد میں آسانی فراہم کرتی ہے۔