ل*لیسکو اور CISNR کے درمیان ڈیجیٹائزیشن اور کاربن اخراج میں کمی کے معاہدے پر دستخط

: ہم نیٹ ورک کو عالمی معیار کے مطابق لانے اور صارفین کو جدید سہولیات فراہم کرنے کیلئے پٴْرعزم ہیں : چیف ایگزیکٹو لیسکو

جمعہ 11 جولائی 2025 21:10

ع*لاہور (اُردو پوائنٹ اخبارتازہ ترین - آن لائن۔ 11 جولائی2025ء) لاہور الیکٹرک سپلائی کمپنی (لیسکو) اور سینٹر فار انٹیلیجنٹ سسٹمز اینڈ نیٹ ورکس ریسرچ (CISNR) کے درمیان بجلی کی تقسیم کے نیٹ ورک کو ڈیجیٹائز کرنے اور کاربن کے اخراج میں کمی کے حوالے سے ایک اہم معاہدے پر دستخط کیے گئے۔ اس منصوبے کی گرانٹ جرمن حکومت نے جی آئی زیڈ کے پلیٹ فارم سے فراہم کی ہے۔

معاہدے کی تکمیل سے لیسکو کو ڈسٹری بیوشن نیٹ ورک کی ڈیجیٹائزیشن، ترسیلی نقصانات میں کمی، بجلی کے معیار میں بہتری اور نیٹ ورک میں شمسی توانائی کے مؤثر استعمال جیسے اہم فوائد حاصل ہوں گے۔ اس تقریب میں لیسکو کی جانب سے بورڈ ممبر طاہر بشارت چیمہ، چیف ایگزیکٹو انجینئر محمد رمضان بٹ اور ڈی جی میراڈ چوہدری محمد حسین،، ڈی جی میراڈ چوہدری محمد حسین، مینیجر پلاننگ اینڈ فورکاسٹنگ ارقم الیاس، ڈپٹی مینیجر ڈیمانڈ فورکاسٹنگ عمار یوسف کھرل، ڈپٹی مینیجر لیگل محمد احمد یوسف اور ڈپٹی مینیجر ٹرانسمیشن پلاننگ مظہر حسنین شریک ہوئے۔

(جاری ہے)

دوسری جانب CISNR اور GIZ کی نمائندگی پروجیکٹ جی آئی زیڈ کے سربراہ جینس برنک مین (جرمنی)، وائس چانسلر یو ای ٹی مردان و سوات ڈاکٹر محمد گل، اور سید فیضان علی شاہ نے کی، جن کے ہمراہ تکنیکی ٹیم کے دیگر ارکان بھی موجود تھے۔ اس موقع پر سی ای او لیسکو انجینئر محمد رمضان بٹ نے کہا کہ یہ معاہدہ توانائی کے شعبے میں ایک انقلابی قدم ہے جو نہ صرف لیسکو نیٹ ورک کو جدید خطوط پر استوار کرے گا بلکہ ماحول دوست ٹیکنالوجی کو فروغ دینے میں بھی مددگار ثابت ہوگا۔یہ معاہدہ ایک بڑا قدم ہے جو ادارے کو عالمی معیار کی جانب لے جانے میں کلیدی کردار ادا کرے گا۔