امیتابھ بچن کے ساتھ کام کرنا ایسے ہے جیسے کسی وائرس کے اثر میں آ جانا،کرن کمار

پیر 14 جولائی 2025 22:45

ممبئی(اُردو پوائنٹ اخبارتازہ ترین - آن لائن۔ 14 جولائی2025ء)بھارتی اداکار کرن کمار نے کہا ہے کہ امیتابھ بچن کے ساتھ کام کرنا ایسے ہے جیسے کسی وائرس کے اثر میں آ جانا۔ وہ اتنے پرجوش اور شاندار اداکار ہیں کہ ان کا جذبہ آپ کی رگوں میں اتر جاتا ہے۔ ایک بار ان کے ساتھ کام کرنے کے بعد ان کے سحر سے نکلنا آسان نہیں، خاص طور پر جب وہ آپ سے انتہائی محبت اور عزت سے پیش آتے ہیں۔

انہوں نے مزید کہا کہ کئی اداکار فلموں میں مار کھاتے ہوئے ردعمل نہیں دیتے، مگر امیتابھ بچن ہر گھونسے پر حقیقت میں دو قدم پیچھے ہٹتے تھے۔ وہ نہ صرف بہترین اداکار ہیں بلکہ علم کا خزانہ بھی ہیں آپ ان سے دنیا کے کسی بھی موضوع پر بات کر سکتے ہیں۔ لیکن میں نے ایک بات ضرور سیکھی ہے کہ ان سے صرف اسی وقت بات کریں جب وہ خود بات کرنا چاہیں۔

(جاری ہے)

کرن کمار نے فلم خدا گواہ کے کلائمیکس سین کی بھی یادیں تازہ کیں، جس میں ان کے ساتھ سری دیوی اور امیتابھ بچن موجود تھے۔

انہوں نے کہا کہ کلائمیکس میں میں دوڑ رہا ہوتا ہوں اور امیت جی اور سری دیوی دونوںطرف گھوڑے پر سوار ہوتے ہیں۔ وہ مجھے اٹھا کر پہاڑ سے نیچے پھینک دیتے ہیں یہی ’پاشا‘ کا انجام ہوتا ہے۔ لیکن اس دوران، ایک گھوڑے کی ٹانگ میرے پاؤں سے ٹکرائی، جس سے میرے پاؤں میں سوجن آ گئی۔