محکمہ زراعت کی سورج مکھی کی کاشت 25جولائی سے شروع کرنے کی سفارش

منگل 15 جولائی 2025 16:23

فیصل آباد (اُردو پوائنٹ اخبارتازہ ترین - اے پی پی۔ 15 جولائی2025ء) محکمہ زراعت نے شمالی پنجاب میں سورج مکھی کی کاشت فوری جبکہ وسطی و جنوبی پنجاب میں خزاں کی فصل کی کاشت 25جولائی سے شروع کرنے کی سفارش کی ہے ۔نظامت زرعی اطلاعات محکمہ زراعت کے مطابق سورج مکھی کی کاشت کیلئے مقامی طور پر تیار کردہ ہائبرڈ ایف ایچ 331اور بیرونی ممالک سے درآمد شدہ ہائبرڈ بیج استعمال کیاجاسکتاہے جو فیصل آباد ڈویژن کے چاروں اضلاع فیصل آباد، جھنگ، ٹوبہ ٹیک سنگھ،چنیوٹ سمیت صوبہ بھر کے تمام شہروں میں باآسانی دستیاب ہے۔

(جاری ہے)

انہوں نے کہاکہ بہتر پیداوار کے حصول کیلئے کھیت میں پودوں کی تعداد 23232فی ایکڑ ہونا اشدضروری ہے جس کیلئے اڑھائی کلوگرام بیج فی ایکڑ ڈال کر مطلوبہ تعداد کو پورا اور اچھی پیداوار کاحصول یقینی بنایاجاسکتاہے۔ انہوں نے کہاکہ سورج مکھی کی فصل تیلداراجناس میں انتہائی اہمیت کی حامل ہے جس کے بیج میں تیل کی مقدار 40سے45 فیصداور لحمیات کی مقدار20فیصد جبکہ حیاتین اے اور بی کی مقدار10،10فیصد ہوتی ہے۔ انہوں نے کہاکہ سورج مکھی 100سے120دن میں پک کر تیار ہو نیوالی فصل ہے جسے سال میں 2مرتبہ جولائی اگست اور جنوری فروری میں کاشت کیاجاسکتاہے۔