آسٹریلیا کا سب سے بدنصیب کھلاڑی گزشتہ 100 سال میں بہترین بالر قرار

سکاٹ بولینڈ کی عمر اب 36 سال سے زائد ہے، وہ گلین میک گرا کے بعد واحد فاسٹ بولر ہیں جنہیں اس عمر میں آسٹریلیا کی ٹیسٹ ٹیم میں شامل کیا گیا

ذیشان مہتاب بدھ 16 جولائی 2025 10:51

آسٹریلیا کا سب سے بدنصیب کھلاڑی گزشتہ 100 سال میں بہترین بالر قرار

جمیکا (اردو پوائنٹ تازہ ترین اخبار ۔ 16 جولائی 2025ء ) آسٹریلیا کے فاسٹ باؤلر اسکاٹ بولینڈ نے ٹیسٹ کرکٹ میں ایک اور یادگار کارنامہ سر انجام دیتے ہوئے ہیٹ ٹرک مکمل کر لی، لیکن ان کے اگلے میچ میں کھیلنے کا امکان اب بھی غیر یقینی ہے۔

سکاٹ بولینڈ نے جمیکا میں ویسٹ انڈیز کے خلاف تیسرے ٹیسٹ کے دوران یہ کارنامہ انجام دیا۔ اس میچ میں ویسٹ انڈیز کی پوری ٹیم صرف 27 رنز پر آؤٹ ہو گئی اور آسٹریلیا نے 176 رنز سے میچ جیت کر فرینک وورل ٹرافی 0-3 سے اپنے نام کر لی۔

بولینڈ آسٹریلیا کے دسویں کھلاڑی ہیں جنہوں نے ٹیسٹ میں ہیٹ ٹرک کی۔ دلچسپ بات یہ ہے کہ وہ 2021ء میں باکسنگ ڈے پر اپنے ڈیبیو میں 6 وکٹیں صرف 7 رنز دے کر حاصل کر چکے ہیں اور اس کے بعد سے انہوں نے 10 وکٹیں ایک میچ میں بھی لی ہیں۔

(جاری ہے)

سکاٹ بولینڈ کی کارکردگی شاندار رہی ہے، لیکن پھر بھی وہ صرف 14 ٹیسٹ میچز کھیل سکے ہیں، حالانکہ آسٹریلیا نے اس دوران 39 ٹیسٹ کھیلے۔

مچل اسٹارک نے انہیں ’آسٹریلیا کا سب سے بدنصیب کھلاڑی‘ قرار دیا۔

اس بار بھی جب ٹیم میں انہیں شامل کیا گیا تو نیتھن لائن جیسے تجربہ کار اسپنر کو 12 سال بعد پہلی بار ٹیم سے باہر کیا گیا۔

بولینڈ کی عمر اب 36 سال سے زائد ہے، اور وہ گلین میک گرا کے بعد واحد فاسٹ بولر ہیں جنہیں اس عمر میں آسٹریلیا کی ٹیسٹ ٹیم میں شامل کیا گیا۔

سکاٹ بولینڈ کی ہیٹ ٹرک میں انہوں نے جسٹن گریوز، شمر جوزف اور جومیل ووریکن کو آؤٹ کیا، جس کے بعد پیٹر سِڈل نے انہیں ’ہیٹ ٹرک کلب‘ میں خوش آمدید کہا۔

سکاٹ بولینڈ کے اگلے میچ میں کھیلنے کا فیصلہ ٹیم کے 3 اہم فاسٹ باؤلرز اسٹارک، پیٹ کمنز، اور جوش ہیزل وُڈ، کی موجودگی پر منحصر ہے۔ اگر ان میں سے کسی کو آرام دیا گیا تو بولینڈ کو موقع مل سکتا ہے، ورنہ شاید انہیں ایک بار پھر انتظار کرنا پڑے۔

دلچسپ بات یہ ہے کہ بولینڈ کی ٹیسٹ باؤلنگ اوسط صرف 16.53 ہے، جو کہ پچھلے 100 سال میں کسی بھی بالر کا بہترین اوسط ہے (کم از کم 50 وکٹوں کے ساتھ)۔

کینگروز کے کپتان پیٹ کمنز نے کہا کہ آج کی ہیٹ ٹرک تین کلاسک بولینڈ وکٹیں تھیں، وکٹ پر سیدھی، عمدہ لینتھ۔ وہ اکثر باہر بیٹھا ہوتا ہے لیکن جب بھی کھیلتا ہے، ہمیشہ اعلیٰ معیار کا بولر ثابت ہوتا ہے۔