کیوی لیجنڈ راس ٹیلر انٹرنیشنل کرکٹ میں نئی ٹیم کی نمائندگی کرنے کیلئے تیار

اپنے ورثے، ثقافت، گاؤں اور خاندان کی نمائندگی کرنا میرے لیے بہت بڑا اعزاز ہے : راس ٹیلر

ذیشان مہتاب جمعہ 5 ستمبر 2025 11:10

کیوی لیجنڈ راس ٹیلر انٹرنیشنل کرکٹ میں نئی ٹیم کی نمائندگی کرنے کیلئے ..

آکلینڈ (اردو پوائنٹ تازہ ترین اخبار ۔ 5 ستمبر 2025ء ) نیوزی لینڈ کے لیجنڈ اور آئی سی سی ورلڈ ٹیسٹ چیمپئن شپ کے فاتح راس ٹیلر انٹرنیشنل کرکٹ میں واپسی کے لیے تیار ہیں۔

تفصیلات کے مطابق 41 سالہ راس ٹیلر عمان میں ہونے والے آئندہ ایشیا-ایسٹ ایشیا-پیسیفک ٹی ٹونٹی ورلڈکپ 2026ء کوالیفائر میں سامووا کی نمائندگی کریں گے۔

ٹیلر کو آج صبح ساموا کے نامزد اسکواڈ میں شامل کیا گیا۔

راس ٹیلر نے انسٹاگرام پر جاری پیغام میں کہا کہ اپنے ورثے، ثقافت، گاؤں اور خاندان کی نمائندگی کرنا میرے لیے بہت بڑا اعزاز ہے۔

واضح رہے کہ راس ٹیلر کی والدہ کا تعلق ساموا سے ہے جس کی بناء پر ان کے پاس ساموا کی شہریت بھی ہے اور اپریل 2022ء میں نیوزی لینڈ کے لیے کھیلے گئے اپنے آخری میچ کے بعد تین سال کا اسٹینڈ آؤٹ پیریڈ مکمل ہونے پر وہ اپنی دوسری قومی ٹیم کی نمائندگی کے اہل ہوگئے ہیں۔

(جاری ہے)

نیوزی لینڈ کی جانب سے ٹیلر نے اپنے انٹرنیشنل کیریئر میں 18 ہزار سے زائد رنز بنائے ہیں۔

وہ 2006ء اور 2022ء کے درمیان نیوزی لینڈ کے لیے 112 ٹیسٹ، 236 ون ڈے اور 102 ٹی ٹونٹی کھیلنے کے بعد ریٹائر ہوئے اور تینوں فارمیٹس میں بالترتیب 7683، 8607 اور 1909 رنز بنائے اور نیوزی لینڈ کے آل ٹائم گریٹس میں سے ایک کے طور پر ختم کیا۔

ٹی ٹونٹی انٹرنیشنلز میں راس ٹیلر نے 122.37 کے اسٹرائیک ریٹ سے 1909 رنز بنائے۔

نومبر 2020ء میں آخری بار ٹی ٹونٹی فارمیٹ میں کھیلنے کے باوجود وہ ٹی ٹونٹی فارمیٹ میں نیوزی لینڈ کے پانچویں سب سے زیادہ رنز بنانے والے کھلاڑی ہیں۔

ساموا ٹی ٹونٹی سکواڈ

کالیب جسمت (کپتان)، راس ٹیلر، ڈیریوس ویزر، شان سولیا، ڈینیل برجیس، ڈگلس فناؤ، سیم فرنچ، کرٹس ہینم-نیبرگ، بین میلاٹا، نوح میڈ، سولومن نیش، سیمسن سولا، فیریٹی سلولوٹو، سومانی تیائی، ایلی توگاگا