سیالکوٹ، سپرنٹنڈنگ انجینئر سرکل کا گیپکو آفس میں کھلی کچہری کا انعقاد

جمعرات 17 جولائی 2025 17:00

سیالکوٹ (اُردو پوائنٹ اخبارتازہ ترین - اے پی پی۔ 17 جولائی2025ء) سپرنٹنڈنگ انجینئر گیپکو سرکل سیالکوٹ سردار جمشید خان نے صارفین کی شکایات کے ازالہ کے لیے آن لائن کچہری کا انعقاد کیا ۔ انہوں نے گیپکو سرکل سیالکوٹ آفس میں فیس بک پر براہ راست صارفین کی شکایات سنیں اور ان کےازالہ کے لئے موقع پر متعلقہ افسران کو ہدایات جاری کیں۔ انہوں نے صارفین سےکہا کہ وہ بارشوں کے دوران بچوں اور مویشیوں کو بجلی کی تنصیبات اور کھمبوں سے دور رکھیں اورکسی بھی جگہ ٹوٹی ہوئی یا خطر ناک تار دیکھیں تو فور ی طور پر ادارے کو اطلاع دیں۔

انہوں نے کہا کہ گیپکو سرکل سیالکوٹ انتظامیہ ہمیشہ سے صارف دوست پالیسیوں پر عمل پیرا ہے یہی وجہ ہے کہ مشکل حالات کے باوجود شہرمیں تمام گھریلو اور کمرشل صارفین کو بجلی کی مسلسل فراہمی کو یقینی بنایا جا رہا ہے لہذا اب عوام کو بھی چاہیے کہ وہ ذمہ دار شہری ہونے کا ثبوت دیتے ہوئے بجلی کے غیر ضروری استعمال سے گریز کریں، دن کی روشنی سے زیادہ سے زیادہ استفادہ کریں اور رات6 تا10 بجے کے درمیان بجلی کا استعما ل کم سے کم کریں، غیر ضروری لائٹس اور برقی آلات بندکریں، عام بلب اور انرجی سیور کی بجائے 0.9 پاور فیکٹر کی ایل ای ڈی لائٹس استعمال کریں، بچوں کو ٹیلی ویژن اور کمپیوٹر کی بجائے فزیکل کھیلوں کی عادت ڈالیں۔

(جاری ہے)

انہوں نے کہا کہ کھلی کچہری کے انعقاد سے عوام کو ریلیف مل رہا ہے ۔اس موقع پر منیجر سی آر سی اکرام اللہ، پی ایس او تصدق ایوب، ڈپٹی منیجرز ذکا اللہ لغاری و دیگر بھی موجود تھے۔