Live Updates

کپاس کے کاشتکار مون سون کی بارشوں کے دوران فصل کے تحفظ کیلئے ترجیحی اقدامات کریں، محکمہ زراعت

جمعرات 17 جولائی 2025 18:54

لاہور (اُردو پوائنٹ اخبارتازہ ترین - اے پی پی۔ 17 جولائی2025ء) محکمہ زراعت پنجاب نے کہا ہے کہ کپاس کے کاشتکار مون سون کی بارشوں کے دوران فصل کے تحفظ کیلئے ترجیحی اقدامات کریں۔ترجمان کے مطابق مون سون کی زیادہ بارشیں کپاس کے پودے پر منفی طور پر اثر انداز ہوتی ہیں، جڑی بوٹیوں کی بھر مار ہوجاتی ہے اورضرر رساں کیڑوں کی تعداد بھی بہت تیزی سے بڑھتی ہے، کاشتکار کپاس کے کھیتوں سے جڑی بوٹیوں کی بر وقت تلفی کو یقینی بنائیں۔

(جاری ہے)

ترجمان نے مزید کہا کہ زیادہ بارشوں کی صورت میں اضافی پانی فوری طور پر کھیت سے نکال دیں کیونکہ اگر زیادہ دیر تک پانی کھیت میں کھڑار ہے تو جڑوں کو سانس لینے میں دقت ہوتی ہے اور 48گھنٹے بعد پودے مرجھانا شروع کر دیتے ہیں جبکہ اگیتی کاشت کی صورت میں فصل کو بارش کے زائد پانی کے نقصان سے بچانے کیلئے کپاس کے کھیت میں کھڑا پانی کسی خالی نچلے کھیت میں نکال دیں یا ایک طرف لمبائی کے رخ کھائی کھود کر پانی اس میں جمع کر دیں،24گھنٹے سے زیادہ بارش کاپانی کھڑار ہے تو بڑھوتری رک جاتی ہے ایسی صورت میں کاشتکار ایک سے 2فیصد یوریا کا محلول بنا کر محکمہ زراعت پنجاب کے مقامی عملے کے مشورہ سے سپرے کر یں تاکہ پودے کی فوری غذائی ضروریات کو پورا کیا جاسکے۔