شام پر اسرائیلی بمباری پورے خطے کے لیے خطرہ ہے ، ایردوآن

جمعہ 18 جولائی 2025 22:50

دمشق(اُردو پوائنٹ اخبارتازہ ترین - آن لائن۔ 18 جولائی2025ء)شام پر اسرائیلی بمباری کے تازہ واقعے کے بعد ترکیہ کے صدر طیب ایردوآن اور شامی صدر احمد الشرع کے درمیان فون پر رابطہ ہوا اور دونوں رہنمائوں نے اسرائیلی بمباری سے پیدا شدہ صورتحال پر تبادلہ خیال کیا۔

(جاری ہے)

اس سلسلے میں ترکیہ کے ایوان صدر سے جاری کردہ بیان میں کہا گیا کہ صدر ایردوآن نے شام کے لیے ترکیہ کی حمایت اور اظہار یکجہتی کیا۔

ان کا احمد الشرع سے گفتگو کرتے ہوئے کہنا تھاکہ اسرائیلی بمباری ناقابل قبول ہے اور یہ پورے خطے کے لیے خطرہ ہے۔ تاہم انہوں نے شام اور دروز قبیلے کے درمیاں جنگ بندی کا خیر مقدم کیا۔شام کے صدر احمد الشرع نے اس موقع پر صدر طیب ایردوآن کی حمایت پر ان کا شکریہ ادا کیا اور تعریف کی کہ وہ شام کے تحفظ اور علاقائی استحکام کے لیے شام کے ساتھ ہیں۔