مون سون کے ایک اور انتہائی شدت والے سپیل کیلئے تیار ہو جائیں

لاہور (اُردو پوائنٹ اخبارتازہ ترین۔ 18 جولائی2025ء) مون سون کے ایک اور انتہائی شدت والے سپیل کیلئے تیار ہو جائیں، 20 سے25 جولائی کے دوران پنجاب کے بیشتر اضلاع میں تیز آندھی،گرد آلود ہواوں اور بارش کا امکان۔ تفصیلات کے مطابق پنجاب ڈیزاسٹر مینجمنٹ اتھارٹی (پی ڈی ایم اے) نے مون سون بارشوں کے چوتھے سپیل کا الرٹ جاری کرتے ہوئے خبردار کیا ہے کہ20 سے25 جولائی کے دوران صوبے کے بیشتر اضلاع میں تیز آندھی،گرد آلود ہواوں اور بارش کا امکان ہے۔

ترجمان پی ڈی ایم اے کے مطابق راولپنڈی، مری، گلیات، اٹک، چکوال، منڈی بہاوالدین، حافظ آباد، گجرات، جہلم اور گجرانوالہ میں تیز ہواوں کے ساتھ بارش کی پیشگوئی ہے جبکہ لاہور، فیصل آباد، سیالکوٹ، نارووال، ٹوبہ ٹیک سنگھ، جھنگ، سرگودھا اور میانوالی میں بھی بارشوں کا امکان ظاہر کیا گیا ہے۔

(جاری ہے)

ترجمان نے مزید کہا کہ18 سے23 جولائی تک جنوبی پنجاب کے اضلاع ملتان، ڈیرہ غازی خان، بہاولپور اور بہاولنگر میں بھی بارشوں کی پیشگوئی ہے۔

وزیراعلی پنجاب کی ہدایت پر ضلعی انتظامیہ اور متعلقہ محکموں بشمول صحت، آبپاشی، تعمیر و مواصلات، لوکل گورنمنٹ اور لائیوسٹاک کو الرٹ جاری کر دیا گیا ہے۔ دوسری جانب پروونشل ڈیزاسٹر مینجمنٹ اتھارٹی خیبرپختونخواہ کی جانب سے بھی جاری موسمی انتباہ کے مطابق موسلادھار/شدید موسلادھار بارشوں کا سلسلہ 20 جولائی سے 25 جولائی تک وقفے وقفے سے جاری رہنے کا امکان ہے، اس دوران دیر، سوات، چترال، کوہستان، مالاکنڈ، شانگلہ، بٹگرام، بونیر ،کوہاٹ،کرک، بنوں، ٹانک،لکی مروت، ڈی آئی خان ،باجوڑ، مہمند، خیبر، وزیرستان، اورکزئی، مانسہرہ، ایبٹ آباد ہری پور، پشاور، چارسدہ، نوشہرہ ،مردان، صوابی،ہنگو،اور کرم اضلاع میں تیز ہواؤں اور گرج چمک کے ساتھ وقفے وقفے سے بارش ہوسکتی ہے۔

21 سے 25 جولائی کے دوران موسلادھار بارشوں کے باعث گلیات،مانسہرہ ،کوہستان، ایبٹ آباد، بونیر، چترال، دیر، سوات، شانگلہ، نوشہرہ، صوابی اور مردان اضلاع کے مقامی/برساتی ندی نالوں میں طغیانی کا خدشہ ہے۔ پہاڑی علاقوں میں لینڈ سلائیڈنگ اور مقامی ندی نالوں میں طغیانی کا بھی خدشہ ہے۔ پی ڈی ایم اے نے ضلعی انتظامیہ کو پیشگی اقدامات اٹھانے کےلیے الرٹ جاری کر دیا ہے۔

پی ڈی ایم اے نے ریسکیو 1122 اور امدادی ٹیموں کو الرٹ اور پیشگی دستیاب وسائل بروئے کار لانے کی ہدایت کی ہے۔ اتھارٹی نے ہدایت کی ہے کہ مقامی انتظامیہ حساس مقامات اور شاہراہوں پر ٹریفک کنٹرول کے لیے اقدامات کرے، ندی نالوں اور ڈرینج سسٹم کی صفائی یقینی بنائی جائے تاکہ اربن فلڈنگ سے بچا جا سکے، کسانوں کو فصلوں کی جلد کٹائی اور محفوظ جگہوں پر ذخیرہ کرنے جبکہ مویشی پال حضرات کو مویشیوں کے تحفظ کے لیے اقدامات کی ہدایت کی گئی ہے. پی ڈی ایم اے نے قومی و صوبائی شاہراہوں پر مسافروں کو محتاط رہنے اور متبادل راستے اختیار کرنے کی ہدایت کی ہے۔

پی ڈی ایم اے نے عوام سے گزارش کی ہے کہ آندھی، ژالہ باری اور گرج چمک کے دوران محفوظ جگہوں پر پناہ لیں، ادارے نے ایمرجنسی سروسز کی دستیابی اور عملے کی تیاری کو یقینی بنانے کی ہدایت کی ہے، تمام اداروں کو موسمی الرٹس مقامی زبانوں میں پھیلانے اور تمام متعلقہ اداروں کو متبادل روٹس اور ٹریفک کے بہاؤ کو مؤثر بنانے کی ہدایت کی گئی ہے۔ الرٹ کے مطابق پی ڈی ایم اے کا ایمرجنسی آپریشن سنٹر مکمل طور پر فعال ہے، عوام کسی بھی ناخوشگوار واقعے کی اطلاع 1700 پر دیں۔