اقوام متحدہ کے سیکرٹری جنرل کا جمہوریہ کانگو کی حکومت اور کانگو ریور الائنس ایم 23 موومنٹ کے درمیان اصولوں کے اعلامیہ پر دستخط کا خیرمقدم

پیر 21 جولائی 2025 15:48

اقوام متحدہ (اُردو پوائنٹ اخبارتازہ ترین - اے پی پی۔ 21 جولائی2025ء) اقوام متحدہ کے سیکرٹری جنرل انتونیو گوتریش نےقطر میں جمہوریہ کانگو کی حکومت (ڈی آر سی ) اور کانگو ریور الائنس/مارچ 23 موومنٹ کے درمیان اصولوں کے اعلامیہ پر دستخط کا خیرمقدم کیا ہے۔قطر کی نیوز ایجنسی کیو این اے کے مطابق یہ بات اقوام متحدہ کے سربراہ کے ترجمان سٹیفن ڈوجارک نے بیان میں بتائی۔

اقوام متحدہ کے سیکرٹری جنرل نے کہا ہے کہ یہ اعلامیہ دیرپا امن، سلامتی اور بے گھر افراد اور پناہ گزینوں کی وطن واپسی کا ذریعہ ہے ۔

(جاری ہے)

انہوں نے تمام جماعتوں پر زور دیا کہ وہ کئے گئے وعدوں کی پاسداری کو یقینی بنائیں۔اقوام متحدہ کے سربراہ نے اس عمل میں سہولت فراہم کرنے کے لیے قطر کی تعریف کی اور قومی حکام، علاقائی اور بین الاقوامی شراکت داروں کے ساتھ قریبی تعاون سے جمہوریہ کانگو میں امن، شہریوں کے تحفظ اور استحکام کے لیے کوششوں کی حمایت کے لیے اقوام متحدہ کے عزم کا اعادہ کیا۔واضح رہے کہ ہفتے کو قطر کے دارلحکومت دوحہ میں جمہوریہ کانگو کی حکومت اور کانگو ریور الائنس/مارچ 23 موومنٹ (ایم 23 ) کے درمیان اصولوں کے اعلامیے پر دستخط کی تقریب منعقد ہوئی ۔ؕ