محکمہ لائیو سٹاک کی مویشی پال حضرات کو بھیڑ بکریوں کو مہلک و متعدی امراض سے بچائو کے لئے فاظتی ٹیکے لگوانے کی ہدایت

بدھ 23 جولائی 2025 13:56

فیصل آباد (اُردو پوائنٹ اخبارتازہ ترین - اے پی پی۔ 23 جولائی2025ء) ایڈیشنل ڈائریکٹر محکمہ لائیو سٹاک وڈیری ڈویلپمنٹ فیصل ۱ٓبادڈاکٹر قیصر خلیق نے مویشی پال حضرات کو گوشت و دودھ کی پیداوار میں اضافہ اور بھیڑ بکریوں کو مہلک و متعدی امراض سے بچائو کے لئےحفاظتی ٹیکے لگوانے کی ہدایت کی ہے۔انہوں نے بتایا کہ چارے میں موجود بیماری کے جراثیم شدید گرمی کے باعث زہریلا مادہ پیدا کر کے بیماریوں کے پھیلاؤ کا باعث بن رہے ہیں۔

انہوں نے بتا یا کہ اگر جانور سست ہو جائے، چارہ کھانا، پانی پینا چھوڑ دے اور اسے بخار و دست کی شکایت محسوس ہو تو یہ اس بات کی علامت ہے کہ اس پر انتڑیوں کے زہر کے مرض نے حملہ کر دیا ہے۔ انہوں نے کہا کہ مذکورہ صورتحال پیدا ہوتے ہی جانوروں کو فوری طور پر علاج کےلئے قریبی مرکز حیوانات پر پہنچایا جائے اور اس کی جسمانی ضرورت سے زیادہ چارہ فراہم کر نے سے گریز کریں ۔

(جاری ہے)

ا نہوں نے کہا کہ بھیڑ بکریوں کو انتڑیوں کے زہر کے مرض سے بچائوکے لئے ڈیڑھ ماہ کی عمر میں پہلا،اڑھائی ماہ کی عمر میں دوسرا اور آٹھ ماہ کی عمر میں تیسرا حفاظتی ٹیکہ لگوایا جائے۔ اس ضمن میں جانوروں کی دیکھ بھال کے بارے میں مفت مشوروں اور رہنمائی کیلئے ٹال فری نمبر 08000-9211کا اجرا کر دیا گیا ہے۔انہوں نے بتایاکہ مذکورہ ہیلپ لائن پر ساتوں دن رابطہ کیا جا سکتا ہے۔