ایکسائز اینڈ ٹیکسیشن آفس سیالکوٹ نےمالی سال 25۔2024 میں ایک ارب 72 کروڑ روپے کی ریکوری کی

سیالکوٹ (اُردو پوائنٹ اخبارتازہ ترین - اے پی پی۔ 23 جولائی2025ء) ڈائریکٹر ایکسائز اینڈ ٹیکسیشن گوجرانوالہ ڈویژن ثوبیہ مالک نے کہا ہے کہ ایکسائز اینڈ ٹیکسیشن آفیسر سیالکوٹ سید تجمل حسین نقوی کی قیادت میں ضلعی ٹیم نے مالی سال25۔2024 کے دوران واجبات اور محصولات کی مد میں 116 فیصد سے زائد وصولی کرتے ہوئے مجموعی طور پر ایک ارب 72 کروڑ روپے کی ریکوری کی ، جو گزشتہ مالی سال کے مقابلے میں 44 فیصد زیادہ ہے۔

یہ بات انہوں نے بدھ کو سیالکوٹ میں واقع ایکسائز اینڈ ٹیکسیشن آفس میں منعقدہ تقریب سے خطاب کرتے ہوئے کہی، جس کا مقصد ضلعی کارکردگی کو سراہنا اور نمایاں خدمات انجام دینے والے افسران کو اعزازات سے نوازنا تھا۔ انہوں نے کہا کہ گزشتہ مالی سال میں ایکسائز اینڈ ٹیکسیشن (ای ٹی او )آفس سیالکوٹ کی جانب سے ایک ارب 18 کروڑ روپے کی ریونیو وصولی کی گئی تھی جبکہ رواں مالی سال کے اختتام پر 54 کروڑ روپے کی اضافی کلیکشن ٹیم کی کمٹمنٹ، مہارت اور محنت کا نتیجہ ہےجس کی وجہ سے سیالکوٹ پنجاب بھر میں سرفہرست رہا۔

(جاری ہے)

اس موقع پر ڈائریکٹر ایکسائز نے ای ٹی او تجمل حسین نقوی سمیت ان افسران کو اسناد اور شیلڈز سے نوازا جنہوں نے مختلف شعبوں میں نمایاں کارکردگی دکھائی۔ ڈائریکٹر ایکسائز اینڈ ٹیکسیشن گوجرانوالہ ڈویژن نے بتایا کہ انسپکٹر انس الطاف نے پراپرٹی ٹیکس کی مد میں 121 فیصد ہدف مکمل کیا ، انسپکٹر اشرف ڈوگر اور انسپکٹر شبیر گجر نے موٹر برانچ میں 157 فیصد ہدف حاصل کیا۔

اسی طرح انسپکٹر قاسم بھٹی نے لگژری ٹیکس میں 703 فیصد کا ہدف عبور کرتے ہوئے غیر معمولی کارکردگی کا مظاہرہ کیا ۔ ثوبیہ مالک نے کہا کہ ایکسائز آفس سیالکوٹ کی یہ شاندار کارکردگی نہ صرف ضلعی بلکہ ڈویژن اور صوبائی سطح پر بھی باعثِ افتخار ہے جس کی بدولت گوجرانوالہ ڈویژن نے صوبہ پنجاب کے تمام ڈویژنز میں نمایاں مقام حاصل کیا جبکہ ضلع سیالکوٹ نے پنجاب بھر میں پہلی پوزیشن حاصل کی۔

انہوں نے کہا کہ ای ٹی او سیالکوٹ اور ان کی ٹیم نے دیانتداری، پیشہ ورانہ مہارت اور ادارہ جاتی وژن کی بہترین مثال قائم کی ہے۔تقریب کے اختتام پر ای ٹی او سید تجمل حسین نقوی نے محکمانہ قیادت کا شکریہ ادا کرتے ہوئے کہا کہ وہ اپنی ٹیم کے ہمراہ آئندہ بھی اسی لگن اور جذبے کے ساتھ کام جاری رکھیں گے۔ انہوں نے کہا کہ ہ ریونیو کلیکشن کے ساتھ ساتھ شہریوں کو بہتر خدمات کی فراہمی، شفافیت اور ٹیکس دہندگان کی عزت و تکریم بھی ان کی اولین ترجیح ہے۔ انہوں نے کہا کہ ہمارا مقصد یہ پیغام دینا ہے کہ ٹیکس کی ادائیگی نہ صرف قومی فریضہ ہے بلکہ ایک ذمہ دار شہری کی ذمہ داری بھی ہے۔