ایبٹ آباد،کمشنر ہزارہ کی زیر صدارت مون سون شجرکاری مہم کے حوالے سے اجلاس کا انعقاد

بدھ 23 جولائی 2025 19:16

ایبٹ آباد (اُردو پوائنٹ اخبارتازہ ترین - اے پی پی۔ 23 جولائی2025ء) کمشنر ہزارہ ڈویژن فیاض علی شاہ کی زیر صدارت مون سون شجرکاری مہم کے حوالے سے اجلاس منعقد ہوا ،جس میں چیف کنزرویٹر آف فارسٹ،تمام اضلاع کے ڈپٹی کمشنرز اور متعلقہ محکموں کے افسران نے شرکت کی۔اجلاس کے دوران چیف کنزرویٹر آف فارسٹ نے بریفنگ دیتے ہوئے بتایا کہ مون سون شجرکاری مہم کے تحت ہزارہ ڈویژن میں 66,174 پھلدار پودے عوام میں تقسیم کرنے کا ہدف مقرر کیا گیا ہے جن میں سے 9,929 پودے مختلف تقریبات کے دوران پہلے ہی تقسیم کیے جا چکے ہیں جبکہ باقی پودے ضلعی انتظامیہ کے ذریعے مرحلہ وار تقسیم کیے جائیں گے،اس کے علاوہ محکمہ جنگلات نے ہزارہ ڈویژن میں مجموعی طور پر 05 لاکھ درخت لگانے کا ہدف مقرر کیا ہے جس پر عملدرآمد جاری ہے۔

(جاری ہے)

اجلاس میں تمام اضلاع کے ڈپٹی کمشنرز نے اپنے اپنے اضلاع میں شجرکاری کے جاری اور آئندہ منصوبوں سے آگاہ کیا،کمشنر ہزارہ نے اجلاس سے خطاب کرتے ہوئے ہدایت کی کہ تمام تعلیمی اداروں کے سربراہان سے ان طلبہ کی فہرستیں حاصل کی جائیں جو شجرکاری میں دلچسپی رکھتے ہوں،ان طلبہ کے ذریعے درخت لگوائے جائیں اور ہر درخت کے ساتھ طالبعلم کا نام و کتبہ (پلیٹ) بھی نصب کیا جائے تاکہ وہ اس درخت کی ذاتی طور پر نگہداشت کرے۔

انہوں نے مزید کہا کہ مقامی کمیونٹی،خاص طور پر نوجوانوں کو شجرکاری مہم میں فعال طور پر شامل کیا جائے تاکہ یہ عمل پائیدار اور مؤثر ثابت ہو۔کمشنر ہزارہ نے ڈپٹی کمشنر ایبٹ آباد اور محکمہ جنگلات کو ہدایت کی کہ وہ باہمی مشاورت سے قراقرم ہائی وے (سپلائی منڈیاں روڈ) پر شجرکاری کا جامع منصوبہ تیار کریں تاکہ نہ صرف شہر کی خوبصورتی میں اضافہ ہو بلکہ ماحول دوست اقدامات کو فروغ بھی دیا جا سکے۔

Facebook Twitter Google + Share on Whatsapp

ایبٹ آباد،کمشنر ہزارہ کی زیر صدارت مون سون شجرکاری مہم کے حوالے سے اجلاس کا انعقاد

متعلقہ عنوان :

مزید قومی خبریں