دھان کی بہتر پیداوار کیلئے محکمہ زراعت پنجاب کی سفارشات جاری

بدھ 23 جولائی 2025 20:20

لاہور (اُردو پوائنٹ اخبارتازہ ترین - اے پی پی۔ 23 جولائی2025ء) ترجمان محکمہ زراعت پنجاب کے مطابق کاشتکار چاول کی اچھی پیداوار کیلئے کھیت میں پنیری منتقل کرنے سے پہلے10 تا15 دن تک پانی کھڑا رکھیں اور پھر کدو کریں ۔ پانی کی کمی کی صورت میں کدو کرنے کیلئے کھیت میں7 دن تک پانی کھڑا کیا جائے اور پانی کی شدید کمی کی صورت میں کم از کم3 دن تک پانی کھڑا رکھیں۔

(جاری ہے)

دھان کی بہترین پیداوار کے حصول کے لیے زمین کو اچھی طرح ہموار کریں۔ترجمان محکمہ زراعت پنجاب نے مزید کہا کہ دھان کے کاشتکار پودوں کی فی ایکٹر تعدادایک لاکھ 60 ہزار رکھیں یعنی پودوں اور لائینوں کا باہمی فاصلہ9 انچ رکھتے ہوئے80 ہزار سوراخوں میں فی سوراخ2 پودے لگائیں۔زنک کی کمی دور کرنے کے لیے جو کاشتکار پنیری میں زنک سلفیٹ استعمال نہیں کر سکے وہ لاب لگانے کے10 دن بعد تک33 فیصد والا زنک سلفیٹ6 کلو گرام یا27 فیصد والا ز نک سلفیٹ 7.5 کلوگرام یا21 فیصد والا زنک سلفیٹ10 کلوگرام فی ایکٹرڈالیں ۔