نہر، ندی، دریا اور سیلابی نالے میں ڈوبنے سے بچائو کیلئے احتیاطی تدابیر اپنانا ناگزیر ہے،وزیراعلیٰ پنجاب مریم نواز

جمعہ 25 جولائی 2025 14:50

لاہور (اُردو پوائنٹ اخبارتازہ ترین - اے پی پی۔ 25 جولائی2025ء) وزیراعلی پنجاب مریم نواز شریف نے کہا ہے کہ حالیہ سیلابی ریلوں میں متعدد افراد کے ڈوبنے کے واقعات انتہائی افسوسناک ہیں،ریسکیو 1122 کی ٹیمیں عوام کو ڈوبنے سے بچانے کیلئے بھرپور اقدامات کر رہی ہیں، نہر، ندی، دریا اور سیلابی نالے میں ڈوبنے سے بچائو کیلئے احتیاطی تدابیر اپنانا ناگزیر ہے۔

جمعہ کے روزڈوبنے سے بچا ئو کے عالمی دن کے موقع پر جاری اپنے ایک خصوصی پیغام میں انہوں نے کہا کہ یہ دن ہمیں احتیاطی تدابیر اختیار کرنے کا شعور دیتا ہے تاکہ قیمتی انسانی جانوں کو بچایا جا سکے، دنیا بھر میں ہر سال لاکھوں افراد صر ف اس لئے جان کی بازی ہار جاتے ہیں کیونکہ ڈوبنے کے خطرے کو سنجیدگی سے نہیں لیا جاتا، نہر، ندی، دریا، سیلابی نالے یا سمندر میں ڈوبنے سے بچا ئوممکن ہے لیکن اس کیلئے احتیاطی تدابیر اپنانا ناگزیر ہے۔

(جاری ہے)

وزیر اعلی مریم نواز نے کہا کہ پنجاب بھر میں نہروں، جھیلوں، ندی نالوں اور دریائوں میں نہانے پر مکمل پابندی عائد ہے، اس ضمن میں وارننگ سائنز، مانیٹرنگ سسٹم اور چیکنگ کو یقینی بنایا جا رہا ہے، ریسکیو 1122 کی ٹیمیں ہر وقت متحرک ہیں اور عوام کو ڈوبنے سے بچانے کیلئے بھرپور اقدامات کر رہی ہیں۔انہوں نے عالمی ادار صحت (ڈبلیو ایچ او)کے تحت اس سال کے تھیم ''کوئی بھی ڈوب سکتا ہے، مگر کسی کو ڈوبنا نہیں چاہئے ''کو اجاگر کرتے ہوئے کہا کہ پانی بلاشبہ زندگی کی علامت ہے مگر بے احتیاطی کی صورت میں یہی پانی موت کا سبب بن سکتا ہے۔

وزیراعلی پنجاب نے والدین سے اپیل کی کہ وہ بچوں کو نہروں، دریاں اور سیلابی نالوں میں نہانے سے روکیں اور محکمہ موسمیات و ضلعی انتظامیہ کے جاری کردہ ایس او پیز پر عمل کریں اور خطرناک علاقوں میں جانے سے گریز کریں۔