ٹیلر فریٹز، ڈینیئل مدویدف اور بین شلٹن کی پیش قدمی جاری، موباڈالہ سٹی ڈی سی اوپن ٹینس مینز سنگلز ٹاپ 8رائونڈ میں داخل

جمعہ 25 جولائی 2025 15:23

واشنگٹن (اُردو پوائنٹ اخبارتازہ ترین - اے پی پی۔ 25 جولائی2025ء) امریکا کے نامور ٹینس سٹار اور ایونٹ کے ٹاپ سیڈڈ ٹیلر فریٹز،روس کے ٹینس کھلاڑی ڈینیئل مدویدف اور میزبان ٹینس سٹار بین شلٹن اے ٹی پی موباڈالہ سٹی ڈی سی اوپن ٹینس ٹورنامنٹ میں مردوں کے سنگلز مقابلوں میں اپنی پیش قدمی کو جاری رکھتے ہوئے کوارٹر فائنل رائونڈ میں پہنچ گئے جبکہ انگلینڈ کے نامور ٹینس سٹار ڈین ایوانز اور انگلینڈ کے ہی کیمرون نوری کا مردوں کے سنگلز مقابلوں کے پری کوارٹر فائنل رائونڈ میں سفر تمام ہوگیا۔

امریکا کے نامور ٹینس سٹار اور ایونٹ کے ٹاپ سیڈڈ ٹیلر فریٹزنے مینز سنگلز کے پری کوارٹر فائنل رائونڈ میں اٹلی کے حریف کھلاڑی میٹیو آرنلڈی کو شکست دی جبکہ ڈینیئل مدویدف نے چین کے وو یبنگ کو شکست دے کر ٹاپ ایٹ رائونڈ کے لئے کوالیفائی کیا۔

(جاری ہے)

موباڈالہ سٹی ڈی سی اوپن ٹینس ٹورنامنٹ کا 56واں ایڈیشن امریکا میں جاری ہے جس میں شائقین ٹینس کو دلچسپ اور کانٹے دار مقابلے دیکھنے کو مل رہے ہیں۔

27 سالہ امریکا کے نامور ٹینس سٹار اور ایونٹ کے ٹاپ سیڈڈ ٹیلر فریٹزنے شاندار کارکردگی کا مظاہرہ کرتے ہوئےمیزبان اطالوی حریف کھلاڑی میٹیو آرنلڈی کو سٹریٹ سیٹس میں 3-6 اور 4-6سے شکست دے کر ٹاپ 8 رائونڈ کے لئے کوالیفائی کیا،جہاں ان کا مقابلہ ہسپانوی حریف کھلاڑی الیجینڈرو ڈیوڈووچ فوکینا سے ہوگا۔ ایک اور میچ میں 29 سالہ روسی ٹینس سٹار ڈینیئل مدویدف نے عمدہ کھیل پیش کرتے ہوئے چین کے وو یبنگ کو سٹریٹ سیٹس میں 3-6 اور 2-6 سے شکست دے کر کوارٹر فائنل رائونڈ کے لئے کوالیفائی کیا،جہاں روسی کھلاڑی کا مقابلہ فرانسیسی حریف کھلاڑی کورینٹین موٹیٹ سے ہوگا۔\932