رواں سال بارشوں کی شدت گزشتہ سال کی نسبت 73 فیصد زیادہ ریکارڈ کی گئی ہے، ریلیف کمشنر پنجاب

ہفتہ 26 جولائی 2025 11:32

لاہور (اُردو پوائنٹ اخبارتازہ ترین - اے پی پی۔ 26 جولائی2025ء) پنجاب میں رواں سال بارشوں کی شدت گزشتہ سال کی نسبت 73 فیصد زیادہ ریکارڈ کی گئی ہے ، متعلقہ محکمے الرٹ رہیں۔ریلیف کمشنر پنجاب نبیل جاوید نے صوبہ بھر کے کمشنرز و ڈپٹی کمشنرز کو الرٹ رہنے کی ہدایت کرتے ہوئے کہا کہ ایمرجنسی کنٹرول رومز میں سٹاف کو الرٹ رکھا جائے۔ ریسکیو 1122 کی ڈیزاسٹر رسپانس ٹیموں کو بھی ہائی الرٹ رکھا جائے۔

موسمی صورتحال کے پیش نظر تمام متعلقہ محکمے الرٹ رہیں اور عوام جاری کردہ احتیاطی تدابیر پر عمل کریں۔ انہوں نے کہا کہ محکمہ موسمیات کی پیشنگوئی کے مطابق مون سون بارشوں کا پانچواں سپیل 28 جولائی سے شروع ہو گا۔ اس کے دوران پنجاب کے بیشتر علاقوں صوبائی دارالحکومت لاہور سمیت مری، گلیات، اٹک، چکوال، جہلم، منڈی بہاوالدین، گجرات، گجرانوالہ، حافظ آباد، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، خوشاب، سرگودھا، میانوالی، ننکانہ صاحب، چنیوٹ، فیصل آباد اور اوکاڑہ میں جبکہ 29 جولائی سے ڈیرہ غازی خان، بھکر، بہاولپور، خانیوال، پاکپتن، وہاڑی، لودھراں، مظفرگڑھ اور راجن پور بارشوں کی پیشنگوئی کی گئی ہے۔

(جاری ہے)

ڈی جی پی ڈی ایم اے نے کہا کہ شدید بارشوں کے باعث مری و گلیات میں لینڈ سلائیڈنگ کا خطرہ ہے ۔ بارشوں کے باعث کچے مکانات مخدوش عمارتوں کو نقصان کا خدشہ ہے ۔ڈی جی پی ڈی ایم اے نے کہا کہ مسافر اور سیاح موسمی صورتحال کے پیش نظر محتاط رہیں اور غیر ضروری سفر سے گریز کریں ۔اربن و فلیش فلڈنگ کی صورت میں محفوظ مقامات پر رہیں گاڑی ہرگز بہتے ہوئے پانی سے کراس نہ کریں ۔ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں ۔