چیئرمین سی ڈی اے اور چیف کمشنر اسلام آباد محمد علی رندھاوا کی زیر صدارت یوم آزادی کے حوالے سے اعلیٰ سطحی اجلاس کا انعقاد

اسلام آباد (اُردو پوائنٹ اخبارتازہ ترین - اے پی پی۔ 26 جولائی2025ء) چیئرمین سی ڈی اے و چیف کمشنر اسلام آباد محمد علی رندھاوا کی زیر صدارت اعلیٰ سطحی اجلاس سی ڈی اے ہیڈکوارٹرز میں منعقد ہوا۔ اجلاس میں سی ڈی اے کے بورڈ ممبران، متعلقہ ڈی جیز اور دیگر سینئرافسران نے شرکت کی۔ اجلاس میں وفاقی وزیر داخلہ محسن نقوی کی ہدایت اور چیئرمین سی ڈی اے و چیف کمشنر اسلام آبا کی سربراہی میں یوم آزادی اور معرکہ حق کو شایان شان طریقے سے منانے کیلئے وفاقی دارالحکومت اسلام آباد میں سی ڈی اے، اسلام آباد انتظامیہ اور ایم سی آئی کی جانب سے کیے گیے انتظامات کا جائزہ لیا گیا۔

اجلاس میں یوم آزادی اور معرکہ حق کی تقریبات کے سلسلے میں اسلام آباد میں عمارات پر قومی پرچم لہرانے، چراغاں کرنے کے ساتھ ساتھ شہر کی تمام اہم شاہراؤں بشمول شاہراہ دستور، کلب روڈ، سری نگر ہائی وے اور جناح ایونیو سمیت دیگر شاہراؤ ں پر خوبصورت لائیٹنگ کے انتظام، ڈیجیٹل اسٹریمرزاور ایل ای ڈیزسے وفاقی دارالحکومت کو خوبصورت انداز میں سجانے کے حوالے سے تبادلہ خیال کیا گیا۔

(جاری ہے)

چیئرمین سی ڈی اے نے کہا کہ معرکہ حق کی تقریبات کو قومی جوش و جذبے سے منانے کیلئے اسلام آباد کے مختلف مقامات پر پرچم کشائی، مختلف شاہراہوں کی رنگ برنگے برقی قمقموں سے سجاوٹ، ثقافتی تقاریب، آتش بازی، ملی نغموں کے مقابلے اور عوامی پروگرامز کا انعقاد کیا جائے گا۔اسی طرح سکولوں کے طلباء کے درمیان تقریری مقابلے، پینٹنگ، ملی نغموں کے مقابلے اور ٹیبلو شوز کا بھی انعقاد کیا جائے گا جبکہ اسلام آباد کے تمام 279پارکس کوخوبصورت روشنیوں سے سجایا جائے گا۔

اس کے علاوہ شہر میں چلنے والی الیکٹریکل اور دیگر بسوں پر معرکہ حق اور یوم آزادی کے حوالے سے برینڈنگ بھی کی جائے گی۔چیئرمین سی ڈی اے نے کہا کہ معرکہ حق اور یوم آزادی کو شایان شان طریقے سے منانے کیلئے خصوصی طور پر صفائی، سیکیورٹی، ٹریفک مینجمنٹ اور پارکوں کی بحالی، بچوں کے جھولوں کو فعال اور خوبصورتی میں اضافہ کرنے کیلئے خصوصی اقدامات کئے جارہے ہیں تاکہ شہری ملی جوش و جذبے کے ساتھ معرکہ حق اور یوم آزادی کی خوشیاں مناسکیں۔

چیئرمین سی ڈی اے و چیف کمشنر اسلام آباد کی ہدایت پر معرکہ حق کی تقریبات کے موقع پر سی ڈی اے اور اسلام آباد پولیس کی جانب سے شہر بھر میں سخت سیکیورٹی کے انتظامات کئے جائیں تاکہ تمام تقریبات پرامن طریقے سے منعقد کی جاسکیں۔ اسی طرح داخلی و خارجی راستوں پر چیکنگ، اہم مقامات پر سی سی ٹی وی نگرانی اور خصوصی سیکیورٹی ٹیموں کی تعیناتی بھی عمل میں لائی جائےگی۔

محمد علی رندھا وا نے کہا ہے کہ معرکہ حق کو شایان شان طریقے سے منانے کا مقصد جہاں ہماری بہادر افواج کو خراج تحسین پیش کرنا ہے وہاں معرکہ حق ہمارے لئے ایک عہد نو کی حیثیت رکھتا ہے۔اس کے علاوہ معرکہ حق اس بات کا عملی ثبوت ہے کہ پاکستانی قوم مشکل کی ہر گھڑی میں متحد اور یکجان ہے اور دشمن کے ناپاک ارادوں کو خاک میں ملانے کے لئے اپنی بہادر مسلح افواج کے شانہ بشانہ کھڑی ہے۔