شاداب کے انتظار میں نائب کپتان کی پوسٹ ختم ہی ہوگئی

یہ فیصلہ کوچ مائیک ہیسن کا ہے، وہ سینئر آل راؤنڈر کی واپسی کے منتظر ہیں : ذرائع

ذیشان مہتاب اتوار 27 جولائی 2025 14:06

شاداب کے انتظار میں نائب کپتان کی پوسٹ ختم ہی ہوگئی

لاہور (اردو پوائنٹ تازہ ترین اخبار ۔ 27 جولائی 2025ء ) شاداب خان کے انتظار میں نائب کپتان کی پوسٹ ہی ختم ہوگئی، دورہ بنگلا دیش کے بعد ویسٹ انڈیز سے سیریز کیلئے بھی کپتان سلمان علی آغا کا کوئی نائب مقرر نہیں کیا گیا۔

ذرائع کے مطابق یہ فیصلہ کوچ مائیک ہیسن کا ہے، وہ سینیئر آل راؤنڈر کی واپسی کے منتظر ہیں، دوسری جانب ایک ’’بااثر‘‘ سلیکٹر تو شاداب کی ٹیم میں شمولیت کے ہی سخت مخالف ہیں۔

تفصیلات کے مطابق مائیک ہیسن اور شاداب خان کوچ اور کپتان کی حیثیت سے ایک ہی پی ایس ایل فرنچائز اسلام آباد یونائٹیڈ میں شامل رہے ہیں، اس دوران ان کی اچھی انڈر اسٹینڈنگ ہوگئی، کوچ کو آل راؤنڈر کی صلاحیتوں پر مکمل اعتماد ہے، وہ انھیں اچھا ٹیم مین بھی سمجھتے ہیں۔

(جاری ہے)

ذرائع نے بتایا کہ دورہ بنگلا دیش کے لیے نائب کپتان کی تقرری نہ کرنے کا کوچ مائیک ہیسن نے کہا تھا، وہ شاداب خان کی واپسی کا انتظار کر رہے ہیں جو جلد ہوتی نظر نہیں آتی، ویسٹ انڈیز سے سیریز کے لیے بھی سلمان علی آغا کے کسی نائب کا اعلان نہیں ہوا، ون ڈے اسکواڈ میں محمد رضوان کے نائب سلمان ہی ہیں۔

ذرائع نے مزید بتایا کہ ایک ’’بااثر سلیکٹر‘‘ تو شاداب خان کی ٹیم میں ہی شمولیت کے شدید مخالف ہیں، گزشتہ دنوں ایک میٹنگ میں ان کا کہنا تھا کہ سینئر آل راؤنڈر کا ٹیم میں آنا ہی غلط تھا، نائب کپتان تو بالکل نہیں بنانا چاہیے، ان کے مطابق سلمان علی آغا غیر سیاسی کرکٹر اور صرف اپنے کام پر توجہ دیتے ہیں۔

شاداب گو کہ نائب کپتان تھے لیکن فیلڈ میں قیادت بھی کرتے نظر آئے، وہ اپنا بیٹنگ آرڈر بھی خود تبدیل کر لیا کرتے تھے، بعض اوقات وہ کسی مخصوص پلیئر کو ٹیم میں شامل کرانے کے لیے بھی زور ڈالتے، اسلام آباد یونائیٹڈ کی وجہ سے ان کے ہیسن سے اچھے مراسم ہیں، وہ اس کا فائدہ اٹھاتے ہیں۔

واضح رہے کہ ایشیا کپ تک شاداب خان کے فٹ ہونے کا کوئی امکان نہیں ہے ،ممکنہ طور پر وہ اکتوبر میں واپس لوٹیں گے، ابھی یہ واضح نہیں کہ میگا ایونٹ میں کسی نائب کپتان کا تقرر ہوگا یا نہیں۔