اعظم خان کی ٹرانسفارمیشن والی تصویر دیکھ کر مداح حیران، کرکٹر کی وضاحت بھی آگئی

یہ تصویر حالیہ نہیں بلکہ پرانی ہے، کام جاری ہے : اعظم خان ، ماضی میں بھی اپنی فٹنس کو بہتر بنانے کی کوششوں کا حصہ رہے ہیں

ذیشان مہتاب اتوار 27 جولائی 2025 14:20

اعظم خان کی ٹرانسفارمیشن والی تصویر دیکھ کر مداح حیران، کرکٹر کی وضاحت ..

کراچی (اردو پوائنٹ تازہ ترین اخبار ۔ 27 جولائی 2025ء ) پاکستان کے بیٹر اعظم خان نے سوشل میڈیا پر گردش کرتی اپنی جسمانی تبدیلی کی تصویر کے بارے میں وضاحت دیتے ہوئے تمام افواہوں کو مسترد کر دیا ہے۔

حال ہی میں ایک تصویر سوشل میڈیا پر وائرل ہوئی تھی جس میں دعویٰ کیا گیا کہ اعظم خان نے صرف 2 ماہ میں حیران کن طور پر 69 کلو وزن کم کر لیا ہے، جس پر مداحوں نے ناصرف ان کی تعریف کی بلکہ حیرت کا اظہار بھی کیا تاہم کچھ صارفین اس دعوے پر شکوک و شبہات کا اظہار کرتے نظر آئے۔

(جاری ہے)

اعظم خان نے انسٹاگرام پر اپنے ردِعمل میں مذکورہ تصویر شیئر کرتے ہوئے لکھا کہ کام جاری ہے، مگر یہ تصویر 2020ء کی ہے، یوں انہوں نے واضح کیا کہ یہ تصویر حالیہ نہیں بلکہ پرانی ہے۔

واضح رہے کہ اعظم خان ماضی میں بھی اپنی فٹنس کو بہتر بنانے کی کوششوں کا حصہ رہے ہیں، 2021ء میں رپورٹ ہوا تھا کہ وہ قومی معیار پر پورا اترنے کے لیے پہلے ہی تقریباً 30 کلو وزن کم کر چکے ہیں۔

ایک انٹرویو میں انہوں نے کہا تھا کہ اگرچہ وہ اپنی جسمانی ساخت نہیں بدل سکتے لیکن ان کی توجہ فٹنس برقرار رکھنے اور بہتر کارکردگی دکھانے پر مرکوز ہے۔