ایشیاء کپ امارات میں شیڈول، وکرانت گپتا بھارتی کرکٹ بورڈ پر برس پڑے

کیا بھارت کرکٹ کی سپرپاور نہیں رہا آپ کی کسی کے سامنے چل ہی نہیں رہی ہے، سپورٹس صحافی نے شدید ردعمل دیدیا

ذیشان مہتاب اتوار 27 جولائی 2025 14:01

ایشیاء کپ امارات میں شیڈول، وکرانت گپتا بھارتی کرکٹ بورڈ پر برس پڑے

نئی دہلی (اردو پوائنٹ تازہ ترین اخبار ۔ 27 جولائی 2025ء ) ایشیا کپ 2025ء کا انعقاد بھارت کی میزبانی میں یو اے ای میں ہوگا جس کی تصدیق پاکستان کرکٹ بورڈ کے چئیرمین محسن نقوی نے کردی۔

پاکستان کرکٹ بورڈ (پی سی بی) کے چیئرمین اور ایشین کرکٹ کونسل (اے سی سی) کے صدر محسن نقوی نے ایشیا کپ 2025ء کے شیڈول کا اعلان کیا تاہم ایشیا کپ کے شیڈول کا اعلان بھارت کو ہضم نہ ہوا، اسپورٹس صحافی وکرانت گپتا نے اپنے ہی کرکٹ بورڈ کو لتاڑ دیا۔

(جاری ہے)

سپورٹس پروگرام کے دوران وکرانت گپتا نے بھارتی کرکٹ بورڈ (بی سی سی آئی) پر تنقید کرتے ہوئے کہا کہ کیا بھارت اب کرکٹ کا سپر پاور نہیں رہا آپ کی کسی کے سامنے چل ہی نہیں رہی ہے۔

وکرانت گپتا کا کہنا تھا کہ بی سی سی نے یوٹرن لیا ہے، پہلے وہ کہہ رہے تھے کہ ہم نہیں جائیں ڈھاکہ اور آج کہہ رہے ہیں کہ ہم آن لائن میٹنگ میں حاضر ہوجائیں گے۔

واضح رہے ایشیا کپ میں 8 ٹیمیں شریک ہوں گی، جنہیں 2 گروپس میں تقسیم کیا گیا ہے، پاکستان، بھارت، یو اے ای اور عمان کو گروپ ’اے‘ میں شامل کیا گیا ہے جبکہ بنگلا دیش، سری لنکا، افغانستان اور ہانگ کانگ گروپ ’بی‘ میں شامل ہیں۔