محکمہ ہائی ویز چوبیس گھنٹے الرٹ ہے اور کسی بھی ہنگامی صورتحال سے نمٹنے کے لیے پوری طرح تیار ہے،ایگزیکٹو انجینئر

اتوار 27 جولائی 2025 18:00

سرگودھا (اُردو پوائنٹ اخبارتازہ ترین - اے پی پی۔ 27 جولائی2025ء) ڈپٹی کمشنر سرگودھا کیپٹن (ر) محمد وسیم کی خصوصی ہدایت پر محکمہ ہائی ویز نے رواں مون سون سیزن کے دوران روڈ سیفٹی اور ٹریفک کی بلا تعطل روانی کو یقینی بنانے کے لیے ہنگامی کارروائیوں کو تیز کر دیا ہے۔

(جاری ہے)

اتوار کو یہاں اے پی پی سے گفتگو کرتے ہوئے ایگزیکٹو انجینئر ہائی ویز ملک گلفام اعوان نے کہا کہ میاں دا بنہ گاؤں اور راتو کالا گاؤں کی سڑکوں کے بارش سے تباہ ہونے والے حصوں میں فوری طور پر بھرائی کی جا رہی ہے۔

مزید برآں بھیرہ ملکوال روڈ پر گھاس اور جھاڑیوں کی صفائی کے ساتھ برم ڈریسنگ کا کام بھی جاری ہے۔ انہوں نے اس بات پر زور دیا کہ یہ اقدامات مون سون کے دوران پانی کے بہاؤ کو منظم کرنے اور سڑکوں کو پہنچنے والے نقصان کو روکنے کے لیے بہت ضروری ہیں۔ انہوں نے کہا کہ ہائی ویز ٹیمیں 24/7 الرٹ ہیں اور کسی بھی ہنگامی صورتحال سے نمٹنے کے لیے پوری طرح تیار ہیں۔