صوبہ بھر میں اب تک مجموعی طور پر 60ہزار سے زائد خاندانوں کو قرضہ جات فراہم کیے جا چکے ہیں، سیکرٹری ہاوسنگ

اتوار 27 جولائی 2025 20:00

لاہور (اُردو پوائنٹ اخبارتازہ ترین - اے پی پی۔ 27 جولائی2025ء) سیکرٹری ہاوسنگ نورالامین مینگل کی زیر صدارت اپنی چھٹ اپنا گھر پروگرام کے حوالے سے ایک اہم اجلاس منعقد ہوا جس میں ڈی جی پھاٹاسکندر ذیشان نے پروگرام کی اب تک کی پیش رفت پر بریفنگ دی۔نور الامین مینگل نے بتایا کہ اب تک صوبہ بھر میں 60,000سے زائد خاندانوں کو بلاسود قرضہ جات فراہم کیے جا چکے ہیں، پروگرام کے تحت اب تک 15لاکھ درخواستیں موصول ہو چکی ہیں جو عوام کے اعتماد اور دلچسپی کا واضح اظہار ہے۔

وزیر اعلی پنجاب کی ہدایت پر 2028تک 5لاکھ خاندانوں کو قرضہ جات کی فراہمی یقینی بنائی جائے گی۔وزیر ہاوسنگ نے کہا کہ سال 2024-25میں قرضہ جات کی فراہمی کا ہدف 47,000خاندان تھا لیکن ہدف سے آگے بڑھتے ہوئے 51,000سے زائد خاندانوں کو قرضے فراہم کیے گئے یعنی 4000خاندان اضافی اس سہولت سے مستفید ہوئے۔

(جاری ہے)

انہوں نے مزید کہا کہ وزیر اعلی پنجاب کی ہدایت پر قرضہ جات کی فراہمی بلا تفریق جاری ہے تاکہ ہر مستحق شہری کو اپنے گھر کا خواب پورا کرنے میں مدد ملے۔

انہوں نے کہا کہ ہم نے کئی نئے مکانات کا دورہ کیا جہاں گھروں کے مالکان کے چہروں پر خوشی اور اطمینان نمایاں تھا۔انہوں نے عوام کے مثبت ردعمل کو پروگرام کی کامیابی کا منہ بولتا ثبوت قرار دیا اور کہا کہ حکومت مستقبل میں بھی اس فلاحی منصوبے کو مزید وسعت دینے کیلئے پرعزم ہے تاکہ 2028تک 5لاکھ خاندانوں کو اس سہولت سے مستفید کیا جا سکے۔